Djamars 14 di mei último tabatin un evento memorabel i importante relashoná ku e ekspanshon di e ofisina di TUI na Schottegatweg. E edifisio yega e punto di mas haltu, i TUI a selebrá esaki di akuerdo ku tradishon di “spantenbier” huntu ku e trahadónan di konstrukshon. Minister Cooper di Tráfiko, Transporte i Planifikashon Urbano tambe tabata presente huntu ku su tim, i a tira un bista riba e trabounan di konstrukshon.
Piso èkstra
Lo ekspandé e edifisio ku un piso èkstra. E trabounan pa esaki a start na novèmber aña pasá, i ta ferwagt ku nan lo keda finalisá e aña aki. Riba e di dos piso nobo aki lo bini lugánan di trabou èkstra i un espasio kaminda por duna training multifunshonal.
Antoin Klein Hofmeijer, Hefe di TUI Dutch Caribbean: “TUI Curaçao aktualmente tin mas o ménos 155 empleado den servisio. Esaki ta hasi nos un dunadó di trabou grandi riba e isla. Pa nos ta importante pa por ofresé tur kolega i tambe futuro koleganan, un ambiente di traha agradabel i sostenibel; awor i den futuro. Konstrukshon di e piso èkstra aki ta duna nos e oportunidat aki. Mi ta sinti mi honrá ku Minister Cooper i su tim tabata presente pa selebrá ku a logra e punto di mas haltu. Pa ami komo Hefe nobo di TUI Dutch Caribbean mesora tabata un bon oportunidat pa sera konosí kuné personalmente.”
Sostenibilidat
Real Estate Developer DREM di famia Van Alstede, ku na 2021 tambe a konstruí e ofisina aktual di TUI na Schottegatweg, ta realisando e konstrukshon. a Meskos ku e tempu ayá, den realisashon di e piso èkstra, tin hopi atenshon pa sostenibilidat. Por ehèmpel uso di materialnan duradero, 168 panel solar riba e dak i isolashon ekselente di e edifisio.
Portal di karga vehíkulo elektróniko – islanan ABC
Den kuadro di e ambishonnan relashoná ku sostenibilidat di TUI, tambe a papia ku Minister Cooper tokante e proyekto di portalnan di karga vehíkulo elektróniko ku TUI a start na fin di 2022 den kolaborashon ku Dynaf. Den kuadro di e proyekto aki, lo instalá un total di 55 portal di karga vehíkulo elektróniko riba e islanan ABC. 30 Di e portalnan aki lo ta situá na Kòrsou, i entretantu yá a instalá 10 di nan. Pa TUI ta importante ku turistanan í e poblashon lokal por hasi uso di e portalnan di karga vehíkulo elektróniko. Pues, enfátikamente tambe ta buska lokalidatnan ku ta aksesibel pa tur hende; manera den Punda, na Westpunt, i na Boca Sami. A pidi Minister Cooper su atenshon spesífiko pa e lugánan públiko aki, mirando ku tin mester di pèrmit di gobièrnu pa por instalá portalnan na e sitionan ariba menshoná.
