Human Rights Defense Curaçao (HRDC), den estrecho kolaborashon ku
Konseho Sosio-Ekonómiko (SER) i Pan American Development Foundation (PADF), a organisá un
enkuentro eksitoso ku enfoke riba promoshon di un merkado laboral inklusivo. E enkuentro ku a tuma lugá
riba 11 di yüni último a trese representantenan di vários organisashon importante huntu, manera
Vereniging Bedrijfsleven Curaçao (VBC), Machinery and Energy BV, Kolektivo Curaçao Foundation,
Stichting Hulp aan Auditief Gehandicapten, Sentro Solari, Deloitte Caribbean, Klinika Capriles, Fundashon
Alton Paas i e Curaçao Investment & Export Promotion Agency (CINEX).
Raul Henriquez, Direktor/Sekretario General di SER, a habri e enkuentro di manera virtual for di Genève,
kaminda, na nòmber di e presidensia di e Asosiashon Internashonal di Konsehonan Sosio-Ekonómiko i
Institushonnan Similar (AICESIS), e ta hibando kombersashonan durante e di 112 Konferensia
Internashonal di Trabou di ILO. Henriquez a enfatisá e nesesidat di medidanan kla di maneho i
strategíanan pa un merkado laboral inklusivo. El a hasi un yamada pa tuma pasonan konkreto pa atendé
ku deskriminashon na boka di trabou, garantisá oportunidatnan igual pa tur empleado i implementá
medidanan pa promové igualdat di ingreso. El a aklamá ku tantu dunado di trabou komo gobièrnu mester
sostene aktivamente diversidat i inklushon den tur sektor ekonómiko.
Raynel Martis, direktor di PADF Aruba y Kòrsou, a moderá e enkuentro i a duna un bista di inisiativanan
regional i konosementu di PADF dirigí riba sostené gruponan vulnerabel i e kolaborashon ku gobièrnu,
NGO-nan i sektor privá pa integrá migrantenan den merkado laboral. El a referí na proyektonan aktual,
entre otro, na Colombia, Brazil, Trinidad & Tobago, Aruba i Kòrsou.
Raymond Jamanika, direktor di HRDC, a enfatisá riba e nesesidat di un merkado laboral inklusivo dor di
mehorá e akesibilidat den sentro di siudat i edifisionan en general pa hende ku tin un limitashon físiko. El a
deklará ku migrantenan indokumentá i personanan ku tin un limitashon tin mesun derechi ku tur otro
hende. Tambe, el a papia tokante e nesesidat di kolaborashon ku invershonistanan sosialmente
responsabel.
Barbara Perquin, konsehero mayó na SER, a deskribí e historial di esfuersonan desplegá, kuminsando ku
e petishon di Promé Minister na aña 2018 pa un ‘Maneho di Poblashon pa Kòrsou’. Esaki a kondusí na un
simposio ‘Migrashon i Desaroyo Sòsio-Ekonómiko’ na mei 2019, dos publikashon di SER riba e tema, dos
diskushon di mesa rondo i un sigiente simposio. E esfuersonan aki a resultá den un karta di konseho di
SER na gobièrnu di Kòrsou na mei 2023 i un manifèst pa un merkado laboral inklusivo, ku a keda ofresé
riba 24 di november 2023 na vários grupo di interes.
Daniel Hodge, presidente di VBC, a enfatisá e retonan aktual di e sistema di seguridat sosial,
spesifikamente e seguro di penshun general (AOV). El a abogá pa ampliashon di e forsa laboral i
modernisashon di lèinan laboral, ku mas fleksibilidat pa inklushon di hende muhé i personanan ku un
limitashon físiko.
Alex Rosaria, mènedjer di programa na HRDC, a trese dilanti tendensianan demográfiko na Kòrsou i a
bogá pa un aktualisashon di e maneho di poblashon. El a deklará ku subida di e edat di penshun (AOV) no
ta un solushon pa largo plaso i a enfatisá e nesesidat pa un kresementu di e poblashon i un evaluashon
dje aserkamentu di migrashon den pasado.
Esnan presente a diskutí e reto i solushonnan tokante inklushon di personanan ku limitashon i migrantenan
indokumentá den merkado laboral. Nan a kompartí eksperensianan i a enfatisá e importansia pa mehorá
transporte públiko, edifisionan, preparashon laboral i formashon pa personanan ku limitashon físiko i
mental.
E enkuentro a ofresé un plataforma balioso pa diálogo i kolaborashon entre vários grupo di interes, ku e
meta pa promové un merkado laboral mas inklusivo na Kòrsou. HRDC i SER ta determiná pa kontinuá ku e
diálogonan akí i tuma pasonan konkreto pa promové inklushon i igualdat den merkado laboral.