EKADK ta buska tur Artista i Kulturista pa pasa konosementu na nos muchanan

Edukashon Kultural Artístiko di Kalidat abreviá komo EKADK ta buskando Artista i
Kulturista ku lo ke pasa nan konosementu na nos muchanan. Kuminsando for di Ougustus 2023, tur hende ku tin un talento di arte of un konosementu kultural ku lo tin gana di pasa e konosementu aki na nos muchanan for di grupo 1 te ku grupo 8 di enseñansa di fundeshi por hasi esaki via di e areglo EKADK.

Pa bo ta parti di EKADK bo mester tin algu di ofresé pa kompartí ku nos muchanan. Algun ehèmpel ta: Komo Músiko (Lès di toka un instrumènt, kanta kantikanan di ántes of di aktualidat ku mucha, siña mucha kanta, siña muchanan historia di músika lokal òf internashonal. Konosementu musikal general. Komo aktor: Konta mucha kuenta, Siña mucha aktua, deklamá, skibi storia. Komo baliadó: Siña mucha balia i move riba músika, Baile folklóriko, moderno kontemporáneo i mas. Komo artista di obra di man: Pinta, Fèrf, traha obra di man.

Komo kulturista: Siña e muchanan di nos kultura di pasado i esun aktual, diversidat di kultura, norma i balor, siña e mucha kushina i/kome nos diferente kumindanan, yerbanan, nos historia, hiba nan i laga nan sera konosí ku nos isla, lugánan históriko pero tambe lugánan nobo den nos kultura.

Asina nos por menshoná hopi ehèmpel mas. Si abo ta un kulturista of un artista i bo tin gana di kompartí bo konosementu na nos muchanan? EKADK tin fondonan i konosementu disponibel pa yuda bo traha un plan i ku e plan bo ta drenta den kontakto ku skolnan i skolnan na nan turno lo kontratá bo.

Dia 26 di jüni lo bai tin un enkuentro 7’or di anochi na Jong Bonaire pa tur kulturista i artista. Durante di e enkuentro aki EKADK lo bai duna informashon riba e posibilidatnan pa abo bira un ofresiendo di Kultura i Arte den skol. Pa mas informashon tuma kontakto ku ACE Foundation na number di telefòn 7965655 òf 7900155.