Den nan afan pa logra mantenshon di disponibilidat operashonal di e di 44 kompania di ehérsito ku aktualmente ta stashoná na Kòrsou, e unidat ta anunsiá ku nan ta bai tene un ehersisio na Boneiru for di 28 di novèmber te ku 7 di desèmber 2023.
E meta mas prinsipal di e ehersisio akí ta pa familiarisá nan mes ku e alrededor boneriano i traha huntu ku outoridatnan i servisionan ousiliar lokal. Banda di esaki e unidat lo dediká su mes na e bon kousa sosial, kaminda nan lo ta aktivamente enbolbí ku aktividatnan ku enfoke komunitario.
Pa hasi nan ehersisionan e unidat ta bai hasi uso di e fasilidatnan i terenonan di e klup di scouting di Rincon komo sitio pa kampamentu. Ademas e unidat lo hasi ehersisio na sitionan konosí, kaminda nan ta risibí ‘briefing’ a base di eksperensia di ehersisionan anterior.
Tambe e komandante di e unidat, kapitan Siebe Eeltink, i e planifikadó di e kuartel general, mayor Arthur Duursma, ta hasi un bishita di kortesia serka gezaghèber interino Oleana.