E eleccion Parlamentario 2021 ta bay den historia como algo único. Pa un isla chikito tin nada menos cu 12 partido político participando den e eleccion, unda mester scoge e 21 miembronan di Parlamento. Ironicamente e sistema di Aruba no ta mustra esun mas democratrico pasobra ta e partidonan ta apunta esnan cu ta bay Parlamento y lo forma e gobierno.
Pero banda di esaki, pa prome biaha tin un político activo y riba lista cu lo ta participando den e eleccion. Benny Sevinger, candidato no. 29 di AVP. Esaki ta bini despues cu ya den e eleccion anterior tabatin un Minister di e mesun partido cu a wordo investiga y condena caba door di Corte di Prome Instancia den caso IBiS cu a trata soberno, labamento di placa y falsificación di documentonan.
Pa dos eleccion sigui e partido partido ta hay’e ta enfrenta electorado cu dos mancha grandi riba e partido. P’esey tabata hopi tristo y lamentabel pa scucha líder di e partido berde, un persona cu na mas cu un ocasión a gana eleccion como e candidato mas popular, a pone Sevinger riba lista. Esaki sabiendo cu tabatin un investigacion andando y sabiendo cu na cualkier momento e por a wordo deteni, manera cu a sosode tambe.
Pero e actitud poco honesto cu a scucha di dje e ultimo dianan aki ta momento cu e ta pidi e ciudadanonan cu derechon di voto, pa duna Sevinger nan confiansa. Pa duna confiansa na homber cu ta sinta tras di trali na KIA. E solo hecho cu a prolonga su detencion cu 60 dia, door di un hues, ta demostra cu tin suficiente base pa e ta un sospechoso serio den caso di manipulación cu terenonan di gobierno y soborno.
Con por ta posibel cu un persona cu ta yama su líder político, hayando e voto popular, por hinca den su cabes pa pidi e ciudadanoann di Aruba pa vota pa un sospechoso. Esaki ta un berguensa pa cara di Aruba den exterior, y cu ta duna Aruba mal nomber. Integridad a keda na werki cu e expresionnan haci door di Eman.
E partido di Mike Eman, cuminsando pa su mes, ta mancha pa e tantísimo denuncia y investigacionnan cu tin contra dje. Su partido a ricibi den pasado donación di figuranan dudoso y cualnan nunca Eman a bini dilanti pa splica of desmentí. Tempo cu Paul Croes a bira un sospechoso, e no a actúa mesora. Y awo e ta apoya Sevinger públicamente, en bes di tuma e actitud di un líder y bisa pa laga husticia cana su caminda.
Actitudnan manera esaki ta motibo cu Hulanda tin duda den Aruba su politiconan pa maneha e isla. E loke cu a sosode cu Sevinger, cu el a aparece riba lista a pesar cu e ta un sospecho tin masha instancia na Hulanda sorprendi.
Tempo cu Mike Eman a drenta política cu hopi palabra bunita e hendenan a bay cu ne y a kere den dje. E actitud cu el a tuma den casonan sospechoso di su partido, manera Paul Croes, a causa cu el a perde e ultimo eleccion y a causa cu algún mil miembro di e partido a laga nan na caya. Esey caba mester tabata un mensahe cla e líder di e partido, kende a pesar di a renuncia durante un momento emocional awe t’ey bek cu e mesun actitud. Esaki ta loke cu pueblo ta desaproba.
Den eleccion 2021 Aruba ta pone un mancha preto den su historia cu un politico sera na KIA participando den eleccion. Sinembargo e ta un situacion similar cu Corsou tambe a yega di pasa aden.