Ministerio Publico tin diferente casonan andando pareu, cada un di nan sigur ta haya e atencion mereci. Sinembargo lamentablemente tin un of mas prensa ta bruha contenido di cada caso, bisto ta cu no por separa dos caso di otro.
Un biaha mas por mira esaki den un matutino local unda claramente ta mira cu e persona cu a skirbi no ta un periodista mirando e mal informacion cu tin y e bruhamento cu kier trece.
Pero tambe e nivel con un noticia mester keda skirbi. Lamentabelmente un medio asina prestigioso ta laga un articulo asina pasa (publica) sin cu e medio mes verifica y of mira si loke ta skirbi ta cuadra.
Loke ta un berdad ta cu aki ta trata di mescla dos caso completamente diferente cu otro, cu ta mal informa comunidad general di Aruba.
No ta un secreto cu algun luna atras autoridadnan a informa cu a tira un inval na DIP na unda cu a bay cu algun material, entre otro computernan ect ect. EA news a acerca Ministerio Publico y a haya confirmacion cu e caso ALOE ta berdad.
Pero ta parce cu di repente a corta reis di ALOE den e investigacion di DIP.
Ayera di repente a sali un publicacion den e matutino cu parce no tabatin un research haci. Un articulo cu parce no tabata skirbi door di un periodista of persona cu sa skirbi tampoco.
Pa cuminsa, e investigacion cu tin den DIP tabata hiba e nomber Aloe, y sorpresivamente OM a dicidi di kita e nomber aki. E pregunta ta? Pakico a pone un nomber y despues kite? A cera e investigacion of no ta sigui investiga mas? Ta preguntanan cu pueblo tin pero no ta haya contesta pasobra Ministerio Publico, manera semper, ta hermeticamente cera y no ta duna informacion na pueblo.
Pakico? Aki ta trata di investigacion na un departamento di Gobierno (pueblo) y e pueblo tin derecho di haya informacion di kico a pasa, kico ta e sospecho y con leu e investigacion ex Aloe ta
Cu e publicacion di e matutino a trata di conecta e investigacion cu esun Diamante cual ta completemente robes. Esun cu a skirbi esaki su mente ta mes bruha cu e forma cu el a skirbi e articulo.
Den e caso cu antes tabata uza e nomber Aloe ta investigando ehecutivonan halto di DIP, envolvi den manipulacion den entregamento di tereno. Pero tambe con a perhudica cierto inversionistanan.