For di den oranan di merdia tabata reina hopi anticipacion pa e discurso nacional den oranan di anochi anuncia y cu a crea hopi expectativa den henter comunidad.
Un anticipacion cu a ser interpreta den diferente forma y manera tabata di spera den e circulo politico rival, e pensamento a bay riba mal noticia for di Hulanda, caminda Prome Minister Evelyn Wever Croes ta cu vacacion na madre patria.
Entre otro rivalnan politico tabata anticipa cu lo por ta trata di e aanwijzing cu a ser papia hopi di dje ultimo simannan mientras cu otronan tabata di opinion cu gobierno pa medio di Prome Minister, lo anuncia un of otro medida contra di pueblo.
Pa 8’or di anochi en berdad Prome Minister Wever Croes a inicia su discurso nacional caminda henter e contenido a sorprende tur hende pa su aspecto positivo, analisando tur e desaroyonan di ultimo dianan, den un intento sincero, di comparti noticianan positivo cu pueblo di Aruba.
Mey mey di speculacionnan politico diariamente, caminda rivalnan politico ta pinta scenarionan negativo y destructivo tur dia pa purba saca probecho politico, esaki a wordo atendi pa Prome Minister den su discurso nacional.
Un di e puntonan mas serio ta e relacion di gobierno di Aruba cu CAft, caminda tin un diferencia di opinion formal cu mas segun Prome Minister, ta e interpretacion di loke CAft ta di opinion cu mester tuma luga y loke gabinete Wever Croes su gobierno ta haya ta miho na e momentonan aki pa wordo realisa.
Evelyn Wever Croes den un expresion calmo y hopi trankil a insisti cu no tin conflicto cu CAft, cu su gobierno a haci hopi pa cumpli cu recomendacionnan di e comision aki y a enfatisa dado momento cu Aruba semper a cumpli cu tur su obligacionnan financiero y lo sigui haci esaki.
Cu hopi determinacion Prome Minister a informa pueblo den su discurso e rumbo y progreso impresionante cu turismo di nos pais ta pasando aden na e momentonan aki, caminda ta alcansando e nivel cu tabatin na 2019 prome cu e pandemia di corona virus a paralisa tur cos.
El a pidi pa tur hende coopera y probecha di e recuperacion di turismo aki mas tanto cu por pa Aruba sigui riba e rumbo aki ya cu esaki ta determinante pa e recuperacion economico tambe den su totalidad.
Na mes momento Prome Minister a dedica na e logro di su colega Minister Endy Croes kende a presenta e gran noticia cu a logra un acuerdo nobo cu e banco Canades pa loke ta reparticion di fondonan di Lotto pa Deporte, loke ta bay nifica cu lo tin mas placa pa permiti mucha- y hobennan di Aruba, sigui progresa den deporte tanto aki na Aruba como den torneonan den exterior.
E noticia mas importante sinembargo den su discurso nacional, tabata caminda Prome Minister a mustra riba e hecho cu su gobierno a logra di cumpli cu pago di e 5% di salario cu a priminti sindicatonan di lo haci y su gobierno a logra na cumpli cu e promesa aki.
El a mustra cu tur hende ta consciente cu tur hende ta sinti e efecto di desaroyonan cu henter mundo a pasa aden ultimo dos añanan, cu e pandemia di covid 19 y awor e efecto di e guera na Ukraina, cu ta influenciando e prijs di petroleo di tal magnitud, causando un inflacio barbaro tambe aki na Aruba.
Cu e logro di siman pasa caminda trahadonan publico y semi publico a ricibi pago di 5% di salario bek riba nan cuenta, gobierno ta spera cu esaki lo yuda alivia e presion cu tin tur caminda relaciona cu e crisis mundial cu tin na e momentonan aki.
Na final Prome Minister a elogia e pasenshi y comprension di trahadonan publico y nan sindicatonan felicitando tur hende y poniendo enfasis cu si tur hende uni y hunto atende e retonan grandi nos dilanti, e progreso di nos pais ta inevitabel.
Na e momentonan aki Aruba no mester di controversia ni pleitamento. Mester concentra pa nos pais saliendo di e posicion cu e ta aden. Un eleccion na e momentonan aki no ta beneficia Aruba. Tur hende mester realisa cu cualkier partido cu ta den Gobierno lo haya su mes confronta cu e mesun situacion. E aumento di debe a bini door di e Pandemia. Sea ta Gobierno di MEP of di otro asignatura, tur lo mester a presta placa. No mester lubida cu Aruba ta e pais mas afecta na mundo cu e pandemia. Prome cu e pandemia tabata hopi cerca di logra e presupuesto balansa. Si no tabata pa e pandemia, esaki lo a sosode y lo a duna Gobierno un miho escenario pa Aruba ta den un situacion diferente di loke ta biba awendia. P’esey mester duna Gobierno e chens di cana e caminda di prosperidad pa Aruba.Nos como Arubiano mester uni y trata di mira e pais den su totalidad, si bo pais ta bon automáticamente abo como ciudadano ta bon riba e pais. Nos tur a pasa den e momentonan difícil, awor Aruba ta den un etapa di recuperación y ta nos como Arubiano mester por hisa e pais aki bek riba pia, un pais cu ta di mi , dibo y di nos tur.