Aruba kier RAFT? Aruba mester di RAFT? Aruba mes a causa e situacion aki? Un cos ta sigur, Aruba mester di bon politico, cu por tuma e medidanan cu mester y no haci e situacion peor, cu Hulanda ta haya mas motibo y oportunidad pa exigi mas. Aruba a cai atras den haci loke e mester a haci, loke ta necesario. Pa e motibonan aki Aruba tin awor Landspakketten cu no ta nada malo pa Aruba, alavez esaki ta demostra no solamente e necesidad pa traha hunto cu respet pa otro den Reino, sino e ta mustra tambe e incapacidad di Aruba su politiconan, pa maneha Aruba.
Aruba tin un autonomia, pero nos tin un nacionalidad y por bisa proteccion di Hulanda cu esaki y si nos no por comporta corectamente, nos ta duna Hulanda e oportunidad pa drenta Aruba via Statuto di Reino pa exigi y si ta necesario tuma over. Loke a haci falta cu Aruba tin mester ta bon politico. Pero ken ta un bon politico? Un bon politico, sigur den temponan dificil mester tuma decisionnan dificil, kizas inpopular, pero na bienestar di Aruba. Apesar cu Aruba tin un desaroyo economico positivo, e tin un situacion financiero dificil pa atende cune y den e caso aki mester a ricibi ayudo di Hulanda. E situacion financiero dificil di Aruba tin su origen. Banda di Pandemia, Aruba su politiconan di un manera of otro a causa un problema financiero pa Aruba. Pesey Aruba mester di bon lider, bon politico, pero e pueblo lo dicidi pa esey?
Kendenan e pueblo mester eligi como parlamentario y gobernante? Na prome lugar y mas cu tur cos, e mester ta uno integro cu ta biba cu Principio y Balornan. Alavez e sa di maneha y por compronde kico ta e necesidadnan berdadero y necesidadnan di e pueblo. Kizas profesionalismo lo por tin, pa analiza e realidad y haya sa e dolornan of retonan di Aruba pa tuma e decisionnan corecto pa tene cuenta cu e pueblo, pero e bon politico cu ta biba cu Principio y Balornan y tin e capacidad pa maneha Aruba, ta parce cu ta dificil pa encontra.
Un politico cu no ta tene cuenta cu e pueblo, cu no ta consulta pa haya participacion y ‘draagvlak’ pa tuma decisionnan corecto, ta un problema. E decisionnan cu ta wordo tuma tin e aprobacion y consecuentemente ta loke pueblo realmente mester? E parlamento y gremionan tin suficiente espacio y participacion, y ta opina riba e maneho di pais Aruba? Den e temponan dificil cu Aruba ta pasando cu e retonan cu tin den e relacion cu Gobierno Hulandes, e politiconan di Aruba no por keda sin tuma decision. Pa e motibonan aki ta necesario y un oportunidad pa e gobierno di Aruba busca y haya un sosten mas amplio pa por hiba mihor negociacionnan cu gobierno Hulandes y yega na e solucionnan. Kizas por intensifica e contenido y ehecucion di landspakketten, pa Aruba haya mas espacio y motibo pa no acepta e RAFT.
Kizas un otro medidanan importante lo por wordo tuma, manera consulta cu expertonan y gremionan, pa duna parlamento y gobierno un bista mas cla di kiconan ta e medidanan cu por tuma. Cualkier decision of posicion cu nos gobierno lo por tuma, mester tin un draagvlak, pero cu tambe ta sali Aruba mihor.
Loke mester haya prioridad ta e principionan etico y di integridad, pa por tuma decisionnan corecto y evita desconfianza mas grandi den nos politiconan y gobierno. Gobierno di Aruba mester haya sa mihor kico ta e coreccionnan cu e mester haci, pa e haci nan y den e caso ey lo por contribui tambe na mehora Aruba su maneho y situacion financiero. Finalmente ta necesario pa bai den un Dialogo cu Hulanda y tuma e medidanan cu mester tuma. Un di e medidanan kizas cu ta dificil, ta pa elimina stempelparlement di un manera of otro.
Nos politiconan mester compronde cu e trabou y responsabilidad politico ta pasahero y mester haci un mihor trabou posibel na beneficio di e pueblo. Si politiconan no por funciona debidamente y e pueblo no sa di coregi esaki, nos tin un problema serio. Ban spera e democracia, transparencia y honestidad di nos politiconan por duna pueblo mas participacion, caminda pueblo ta laga su voz rezona cerca nos politiconan y converti nan den mihor politico pa goberna pais Aruba.
1 comment
[…] Source link […]