Sekretario di Estado Van Huffelen di Asuntu Interno i Relashon den Reino a nombra sr. E.E. (Edison) Rijna komo representante spesial na Hulanda Karibense pa fondonan di Union Europeo, Fondonan di Nashonnan Uni i asuntunan ekonómiko pa loke ta trata Latino Amérika. Sr. Rijna ta kuminsá dia 18 aprel 2023 den su funshon nobo i na mes momentu lo baha komo gezaghèber di Entidat Públiko Boneiru.
Ku su nombramentu komo representante spesial den e añanan binidero e gezaghèber aktual di Boneiru lo enfoká entre otro riba mihó akseso na fondonan di Union Europeo (EU) i Nashonnan Uni (VN) pa e islanan di Hulanda Karibense (Boneiru, Saba i Sint Eustatius). E lo sòru di mantené kontakto ku komishon Europeo na Bruselas i organisashonnan afiliá na VN ku ta relevante pa Hulanda Karibense. Aki e lo identifiká proyektonan ku lo brinda oportunidat nobo na nos islanan.
Banda di esei komo representante spesial pa relashon ekonómiko pa Latino Amérika e lo guia mishonnan ekonómiko pa i di Latino Amérika i Amérika Sentral. Meta di e mishonnan aki lo ta pa duna kompania i otro organisashonnan di Hulanda Karibense mihó akseso na merkadonan den serkania i pa lanta interes serka paisnan den bisindario pa invertí i hasi negoshi na Hulanda Karibense. Un volúmen mas grandi di hasi negoshi i invertí ta yuda fortalesa ekonomia di e islanan.
Sekretario di estado van Huffelen ta entusiasmá ku e nombramentu: “mi ta hopi kontentu ku sr. Rijna a aseptá e reto aki. Ku su vários añanan di eksperensia komo gezaghèber i ku un ret internashonal amplio den region, mi ta konvensí ku komo representante spesial e por ta di gran nifikashon pa e islanan i Hulanda. Den su ròl nobo e por duna un aporte importante na akseso na fondonan di EU i VN, oumentá prosperidat i amplia e base ekonómiko. Nos ta gradesido pa sr. Rijna su gran esfuerso hasí komo gezaghèber di Boneiru.”
Sr. Rijna ta gezaghèber for di 2014. Na 2020 a bolbe nombré pa un periodo di 6 aña komo gezaghèber. Pa mas ku un aña kaba e ta alabes Territorial Authorized Officer (TAO) pa Boneiru na Union Europeo: “Den mi ròl di representante spesial mi por eksplorá posibilidatnan nobo pa Boneiru, Saba i Sint Eustatius pa koperashon internashonal. Dor di nos relashon ku EU, tin hopi oportunidat ku nos por probechá di dje. Esaki ta konta tambe pa algun organisashon ku ta kai bou di Nashon Uni ku por nifiká hopi pa nos islanan. Mi ta kontentu di por bai traha riba relashonnan fruktífero ku vários partido enbolbí. ”
E nombramentu aki ta drenta na vigor riba 18 di aprel 2023. For di e momentu ei sr. Nolly Oleana lo fungi komo gezaghebber interino te na momentu ku terminá e proseso di solisitut pa un gezaghebber nobo.
