Den cuadro di e iniciativa di F.A.A. “bisa NO na abuso di anciano” (desde 2011) awe dia mundial di nos grandinan F.A.A. ta enfoca entre otro riba e fenomeno global di edadismo of discriminacion pa edad cu a yega e punto di un pandemia.
E discriminacion pa edad ta un fenomeno global cu tin consecuencianan grave pa hende y henter e comunidad. Edadismo ta referi na stereotiponan y discriminacion contra hende di adulto mayor basa riba e simpel caracteristica esta: di “Edad di 60+”. Segun informe mundial di Organisacion di Estadonan Uni (‘United Nations’) riba discriminacion pa edad, mita poblacion mundial ta contra hende di adulto mayor. Discriminacion pa edad a resalta den diferente area durante e pandemia di COVID-19. Algun ehempel di esaki ta desemboca den odio cu ta wordo expresa den discurso publico y rednan social. Hasta cu unda e palabra holocausto a cay. (di esaki tin diferente ehempel, incluso den mundo medico: e fenomeno di ranka plug, isolacion na cas y den institutonan di tur hende riba di 65, den mundo financiero, mundo bancario, abuso verbal, etc. etc.)
E fenomeno di edadismo aki tambe a wordo enfatisa pa Secretario General di Nacionnan Uni, esta Antonio Guterres. Hopi ta e hende di adulto mayor cu tambe ta reconoce cu COVID-19 a intensifica discriminacion pa edad y e estigmatisacion di hendenan di adulto mayor.
A pesar di su impacto dañino, e discriminacion pa edad ta sigui di ta pa gran parti desconoci, pa hopi gobiernonan. Hasta di ta wordo considera ainda mas aceptabel den comparacion cu otro forma di discriminacion.
Na nivelnan mundial ya a cuminsa studia e fenomeno aki y a propone algun estrategia con ataca e fenomeno aki. (Global strategy and action plan on ageing and health (2016–2030)) Algun punto cu ta resalta den e strategianan aki ta :
- pa hiba campaña pa sensibilisa comunidadnan riba discriminacion pa edad • pa duna bos na e persona di edad pa nan por comparti experiencianan real di discriminacion pa edad
- Crea sinergia cu trabounan di conseho di derechonan humano y enfoca, muy en particular, riba derechonan humano di e hende di adulto mayor riba ‘Dia Internacional di e Persona di adulto mayor’ y dia 15 di juni dia mundial contra abuso di nos grandinan. E contenido di proteccion y inclusion di nos grandinan ta algo cu mester mas atencion. F.A.A. lo sigui cu e lucha pa un dia Aruba tambe por conoce banda di e leynan contra abuso di mucha, di bestia (cacho), di plastik, etc. pero tambe leynan pa proteccion y inclusion di nos grandinan, leynan pa promove salud y bienestar den vehes. etc. Tur esakinan por sosode pa medio di reorientación di nos comunidad di tal manera cu nos sociedad lo percibi ciudadanonan di edad y atende nan cu respet. Tur esaki segun ‘Plan di Accion Internacional di Madrid riba envehecimento (2002).