Ecotech Freezone lo conoce un cambio den e desperdicio cu e ta acepta entrante dialuna dia 2 di januari 2023. E cambio aki ta bin na vigor awor cu Minister Ursell Arends a anuncia cu lo cera dump na Parkietenbos. Consecuentemente, Ecotech Freezone lo ta encarga pa maneha “green waste”. Ir. Edwards Jimenez, Operations Manager di Ecotech Freezone NV, a comenta cu esaki lo ta un servicio nobo cu nan lo maneha, banda di desperdicio domestico, comercial y taira, cu ya nan ta maneha pa hopi aña caba.
Ecotech Freezone NV tin cinco aña encarga, entre otro, cu e procesamento di sushi residencial y comercial di un manera exitoso. Diariamente, decenas di trucknan di sushi di diferente compania ta yega e planta pa entrega nan desperdicio, cu consecuentemente Ecotech Freezone ta separa, recicla, reuza y procesa. Locual no por reuza of recicla lo compacta y empaketa y transporta pa e Sanitary Landfill na Seroe Teishi. Mester menciona cu e procedura aki a haci un diferencia grandi y como tal ta masha poco desperdicio a sigui bay riba e landfill na Parkietenbos. Cu e anuncio di Gobierno di Aruba awor, lo cera e dump y lo demas desperdicio ta yega Ecotech Freezone pa por procesa.
Deshaci di “green waste”
Pueblo por deshaci di “green waste” na un forma facil, lihe y mas cu tur cos, pornada. Tur pickup y/of persona individual tin e posibilidad di hiba nan “green waste” , un biaha pa siman na Ecotech Freezone na Barcadera, sin ningun costo. E compania lo supervisa ken tur ta trece “green waste” y alabes si ta bin un bes pa siman of mas. Tanten cu ta “green waste” di cas, no tin costo, pero si ta un negoshi of un persona ta cobra pa haci cura limpi di diferente ciudadano y ta yega regularmente pa deposita “green waste” , ey si tin un costo.
“Green waste” ta tur locual cu tin den bo cura, pues blachi di mata, mata, foyo y yerba. Tur locual cu bo ta corta den bo hardin ta considera como “green waste”. Si bo tin pallet di palo den bo cura, tambe por hib’e, mirando cu ta consider’e como “green waste”.
Mas eficiencia, menos gasto
Locual ta mas importante: Procesamento di “green waste” ta bay man den man cu separacion. Mas e ciudadano separa e sushi, mas chens e tin di hay’e gratis. Menos e separa y inclui tur tipo di sushi hunto, seco como muha, e ora mester conta riba un cobransa. Pues unicamente “green waste” di cas, sin mescla cu otro tipo di sushi, lo ta gratis.
Tene cuenta cu sea bo mes ta sortia e sushi of bo ta paga pa un otro sortie na Ecotech Freezone. Mas mescla e sushi yega, mas contamina e ta cu otro tipo di desperdicio, mas lo bo tin cu paga pa e proceso di sortiamento.
E proceso
Ecotech Freezone ta habri di dialuna pa diabierna fo’i 7:00 am te cu 4:00 pm. Asina cu e cliente yega na Ecotech Freezone, e proceso ta cuminsa door di pasa na e bentana y avisa kico tur a trece. Si tin un gasto mester pasa paga na e benta y si no, lo haya un carchi pa punch in y laga e desperdicio, punch out y asina bo ta keda cla cu e proceso. Lo pisa e vehiculo cu ta trece “green waste” na su entrada y despues na su salida, pa por tin un idea di e cantidad di “green waste” cu a yega e facilidad.
Bo tin varios opcion
Ecotech Freezone N.V. no ta un compania di recogemento di desperdicio, sino ta e planta cu ta procesa desperdicio na Barcadera. Tene cuenta cu tin varios opcion ora cu ta trata companianan cu ta recoge desperdicio, sea na cas of negoshi. Cliente lo por scoge mara na servicio y prijs. Tur compania, na final, lo entrega e desperdicio na Ecotech Freezone. Mescos cu awor, lo tin un costo pa deposita e desperdicio. Pues, si bo kier scoge pa e comodidad y servicio, lo tin un costo. Pero, pa esunnan cu nan mes kier trece “green waste” den nan pickup, e ta gratis.
E diferencia
Hiba bo desperdicio na Ecotech Freezone tin varios beneficio cu ne. Un di nan sigur ta cu no mester subi un sero. Na Ecotech Freezone bo auto ta core riba klinker. Otro beneficio ta cu lo minimalisa candela cu semper tabata un molester pa e area di Parkietenbos. “Nos a haci un inversion miyonario den mashinnan nobo pa procesa y separa tur desperdicio, tambe “green waste”. Locual cu no por recicla ni reuza, lo dera na Seroe Teishi na un manera eficiente cu ta na fabor di nos medio ambiente”, di acuerdo cu Ir. Edwards Jimenez.
Tocante Ecotech Freezone
Ecotech ta existi desde aña 1985 y como tal ta un pionero den e industria aki. Na aña 2009 a crea sushi Freezone, cu un planta di separacion profesional y unico den Caribe. Desde cinco aña caba nan ta encarga pa procesa un gran parti di desperdicio na Aruba, tanto esunnan comercial como esunnan residencial. Ta haci esaki cu gran exito. Pero ta consciente cu ainda falta algun detaye pa por cera dump na Parkietenbos completamente y un di nan ta procesamento di taira, y “green waste”.
