ORANJESTAD,Aruba
Career IQ ta presenta e prome di e tres sesion di e conferencia virtual “Restart Conversations”. E prome sesion aki lo enfoca riba economia y “small businesses” na Aruba.
E orador principal di e mainta aki lo ta Rendell de Kort, cu ta e “Chief Data Officer” na Cornerstone Economics y miembro di directiva di Fundacion Guia Mi. Rendell ta specialisa den ‘data solutions’ y ta un economista cu mas di 10 aña di experiencia den “public policy and development”. El a traha como un economista den e departamento di sondeo na Banco Central di Aruba y ta un experto den proyeccion macro economico y data cientifico. Ademas di esaki a publica varios di su articulonan cientifico, di cual esun mas recientemente tabata e topico “Forecasting Tourism Demand through search queries and Machine Learning”, pa Bank for International Settlements.
E conferencia virtual aki lo cuminsa cu e focus principal di e sesion cu ta pa siña mas di e Economia di Aruba. Abo como participante lo por forma parti di e combersacion cu e panel sesion cu e profesionalnan den e ramo aki. E panelistanan invita ta Maria Dijkhoff-Pita cu ta directora di Departamento di Asuntonan Economico, Commercio y Industria di Aruba, Marielsa Croes economista di MGM Source Economic Financial Investment, Luenne Gomez cu ta e directora di Departamento di Impuesto y economista Rendell de Kort.
Den e di dos parti di e mainta di e conferencia virtual aki lo tin e posibilidad pa adkiri mas percepcion, vision y tips di entrepeneur local Jairo Boekhoudt, cu ta e managing director di JdB Agency, cu ta un creative advertising and marketing agency na Aruba cu ta estableci 10 aña pasa caba como un accion directo di e crisis economico di 2008. Jairo lo comparti cu e audiencia con su experiencia tabata den tur esaki y kico ta e lesnan cu el a siña for di dje durante e crisis cu por yuda nos tur formula nos pensamento y ademas adkiri tips valioso pa drenta den e siguiente etapa den e historia di Aruba durante y despues di Covid-19.
Siguiendo e sesion di Jairo lo ta un panel di entrepeneurs cu lo ta Atan Lee Jr. propetario di Peanuts Restaurant, Francis Saladin Director di FRASA, Lindy Croes representante di Camara di Comercio Aruba y Jairo Boekhoudt. Durante e panel aki abo como partcipante por manda bo pregunta pa e panelistanan y asina forma parti di e discusion. E ta e responsabilidad civico di tur Arubiano pa kier rehabilita nos isla y participando na e conferencia aki bo por forma un parti activo den esaki.
E meta principal di e conferencia virtual aki ta pa trece discusion al caso den e areanan aki y tambe teniendo na cuenta e situacion cu mundo y Aruba ta pasando aden cu e Covid-19. Career IQ kier stimula combersacion entre tur e participantenan pa pensa con pa por “restart” Aruba durante y despues di e crisis mundial aki.
Pa bo por participa na e conferencia virtual gratis aki bo tin cu registra. Bishita e pagina di social media di Career IQ Aruba riba Facebook of Instagram pa mas informacion. E summit aki lo ta riba e siguiente diasabra nan dia 2, 9 y 16 di mei di 10 or pa 11 or y mey di mainta.
Registra y asina forma parti di e combersacion pa “restart” Aruba.
Un danki na nos partners nan: Aruba Tourism Authority y Aruba Airport Authority
