Awe, nos ta yama pa rekonose un berdat desafiante: e krisis klimatiko ku nos ta enfrenta no ta un problema ambiental solamente; su raisnan ta profundamente dera den kolonialismo. I pa lugarnan manera nos isla Bonaire, e impakto kolonial no ta simplemente historia — e ta un realidad ku ta kontinuando.
Bonaire no ta den un era post-kolonial. Nos ahinda no ta liber di influensia i dominio kolonial , pasobra awe, Bonaire ta sigui eksperimenta opreshon bao di kolonialismo kontemporaneo. Aunke nos por ta aparese riba mapa komo partei di Hulanda o Reino Hulandes, nos ta anèksa i ankra den konstitushon Hulandes bao di derechonan desigual i kontra e deseo i voto demokratiko di e pueblo Boneriano. Nos pueblo no tin e libertad pa goberna nos isla kompletamente, pa protehá nos rekursonan, of pa forma nos futuro sin interferensia. Hulanda ta mantene kontrol signifikativo riba Bonaire, tumando desishonan ku ta impaktá profundamente nos medio ambiente, ekonomia i komunidad.
Pa dekadanan, podernan kolonial a eksplotá i extraé rekursonan di tur parti di mundo sin konsiderá e medio ambiente lokal of e hendenan ku ta dependé riba esakinan. E eksplotashon aki, ku a krea e krisis klimatiko global, ta kontinua den luganan manera Boneiru. Di manehonan ku ta priorisá interes aheno riba di interes lokal, te ku desishonan ku ta limita nos abilidad di protehá i manehá nos rekursonan. E legado di kolonialismo ta na bida den un forma moderno.
Awe, e pueblo di Boneiru ta eksperimentá e konsekuensianan di kambio klimatiko mas intensamente ku esnan ku ta na poder. Nivel di laman ku ta subi i ta pone nos kosta na peliger, klima ekstremo ta pone nos kasnan na riesgo, i akseso na rekursonan ta birando mas limitá. Sinembargo, a pesar di karga e peso aki, Boneiru tin poder limitá pa implementá manehonan ku ta priorisá protekshon ambiental lokal ariba benefisionan eksterno.
Den e konteksto aki, hustisia klimatiko pa Boneiru tambe mester ta ensera libertad for di opreshon kolonial. E mester nifika rekonosemento di nos derecho di propio-gobernashon, pa protehá nos rekursonan, i pa lidera nos maneho ambiental. Mundu mester kompronde ku atende ku e krisis klimatiko ta inseparabel di desmanteláshon di e sistema di kontrol i eksplotashon ku kolonialismo a laga atras — den nos kaso, e sistema kolonial ku Hulanda ta kontinua ta imponé riba Boneiru.
Mientras nos ta buskando solushonan pa e krisis klimatiko, nos no por ignora e realidatnan di kolonialismo kontemporaneo. Kolonisashon, e invashon inhumano ilegal i e ekstrakshon di nos rekursonan natural, a destrui nos naturalesa, nos luga di biba, nos manera di bida, i a kontribuí na e krisis klimatiko i ambiental ku nos ta eksperensiendo awe.
E problema no ta kalientamento global of krisis klimatiko, esaki ta konsekuensianan, e problema ta kolonialismo, e ambishon sin fin I sin konsiderashon i insostenibel di e kolonisadornan ku ta sigi modernisando nan metodonan i sistemanan na limitenan ekstremo ku nos a jega ne awe.
Awe, e mesun kolonisadornan ta bolbé bek i ta bisa ku mundu tin un problema, si, despues ku nan a invadí i destrui nos teritorionan i nos mundo, a laga nos atras, destrui, i a yama nos 3er mundo, awor ta bolbe bek serka nos pa kiko? Pasobra boso 1er mundo insostenibel no tin mas opshon?
No tin futuro berde, blou o oranjo pa nos komo pueblo kolonisa den nos teritorionan kolonisa.
Nos mester lucha pa sostenibilidat berdadero, i esaki solamente ta posibel pa medio di igualdad real i libertad real, pa nos isla Bonaire i otro komunidatnan ku ta sigui wordu afektá ba e legado kolonial opresivo, extraktivo i destruktivo.
Asina so nos por traha pa un futuro unda nos pueblo por konstrui resilensia, protehá nan tera, i asegurá un mundo sostenibel i husto pa generashonan di futuro.
