Awe den oranan di mainta a drenta e noticia cu e famoso locutor local Roberto A Geerman a fayece.
Roberto A, manera e tabata conoci den mundo di radiodifusión, tabata sufri di un quebrante di salud for di algun luna caba cu a hib’e permanece basta siman den dr. Horacio Oduber Hospital.
Na momento cu el a sali, e mester a cana cu un mashin pa yud’e hala rosea, ya cu su pulmonnan a keda afecta. Y esaki no tabata di COVID. Roberto a dicidi di aleha di radio aña pasa y dedica tempo na su salud. Sin embargo e amor pa su trabou tabata asina grandi, cu e tabata traha de bes en cuando riba diasabra na Radio Galactica, unda cu el a labora e ultimo añanan.
Fin di aña e tabatin su di 43 conteo di fin di aña den su carera, algo cu ningún hende a logra.
E descanso aki,unda el a bay biba casi banda di lama pa haya aire puro, tabata pa e por recupera y dedica tempo na su famia y yiunan.
Diasabra ultimo den oranan di anochi el a cuminsa sinti su mes malo y mesora a pone su rumannan na altura y a dicidi di yama ambulance cu a transporte pa hospital. A dicidi di intern’e y haci algun examen mas.
Diadomingo e tabata activo riba Facebook mandando pabien pa su yiu CIndy cu a haci aña. Awe mainta a avisa familiarnan cu el a haya complicacion y a fayece.
Roberto Geerman sigur tabata un persona cu a siña hopi di esnan cu awe ta locutur, manera di papia y articulo. DIrectora di eanews mes a comparti cu Roberto den su diferente actividadnan y por a siña hopi di dje prinsipalmente na manera di uza e stem, tambe a yega di compaña Roberto den su hazaña temporada di carnaval unda cu e ta keda pone ambiente den e ruta di carnaval te den oranan di mainta cu carnaval ta cuminsa y henter anochi e ta keda acompaña pa automobilistanan cu ta apoye cu e ta keda cu e ambiente riba caya sparando dia habri pa carnaval cuminsa. E tempo ey Roberto Geerman tabata traha na canal 90 un di e radionan mas scucha den e epoka ey. Gerencia di E Arubiano News ta manda condolencia pa henter famia y ta bisa danki na Roberto Geerman pa su amistad y experencia y consehonan cu tabata duna.
Na su yiunan, su rumannan Edith y Alvin, sobrinonan y demas famia hopi forsa den e dianan aki.
