Diasabra ultimo, 4 di november 2023, Fundacion Orguyo a organisa un caminata di Diversidad. Orguyo a invita miembronan di e comunidad LGBTQI+ hunto cu famia, amigo, colega y pueblo en general pa participa den e caminata di Diversidad. Un caminata cortico, menos di 1 km, pero cu un impacto positivo grandi.
Orguyo ta hopi contento di por a wak asina hopi amigo y famia cu a participa.
Fundacion Orguyo desde 2019 a sa di traha pa crea un comunidad inclusivo y diverso. Como parti di esey su directiva dia 10 di november proximo lo ta na Den Haag, Hulanda. Diabierna awo lo personalmente representa e fundacion na e caso den casacion na Hoge Raad.
Manera ya ta conosi, Orguyo a hiba Pais Aruba Corte na 2019, exigiendo pa corte habri matrimonio pa parehanan di mesun sexo. Na 2020, meymey di pandemia, Orguyo a gana e caso. Corte a stipula cu Pais Aruba ta discrimina door di no ofrece parehanan di mesun sexo un alternativa igual manera corte Europeo ta stipula.
Orguyo a apela e caso aki y na december 2022 a gana su caso, na unda cu Corta a duna Orguyo rason completo. Corte a cumpli cu e demanda di Orguyo, declarando cu matrimonio ta habri pa parehanan di mesun sexo. Esaki lo ta aplicabel dentro di 3 luna despues di e veredicto, si Pais Aruba no dicidi di apela esaki. Esaki a resulta den e caso di casacion, na unda Fundacion Orguyo lo ta defendiendo su argumento y ponencianan na Hoge Raad diabierna binidero.
Fundacion Orguyo ta gradici pueblo completo cu a sa di responde na e invitacion pa cu e Diversity Walk y nos ta spera cu tur hende na Aruba cu a, ta y lo wordo confronta cu intolerancia, discriminacion of odio, sa cu nan no ta nan so. Semper lo tin compasion, aceptacion y amor pa e ser humano den nos Pais.
Nos tabata tey, nos tey y nos semper lo tey!
