Tijdelijk Werkorganisatie (TWO) di Hulanda y Aruba conhuntamente cu grupo di expertonan ta den dialogo
E siman aki trabounan pa loke ta reformanan den cuadro di landspakket ta tumando luga. Tijdelijk Werkorganisatie (TWO) Hulanda conhuntamente cu Tijdelijk Werkorganisatie (TWO) Aruba y primordialmente grupo di expertonan local, ta preparando riba e siguiente agenda di ehecusion. Esaki ta e prome sesion cu ta tumando luga desde cu a firma e acuerdo mutuo 4 di april 2023 den cual a duna contenido na e forma di traha basa riba respet mutuo.
Den e siguiente dianan e profesionalnan lo tin un programa yen, caminda cu lo trata diferente tema relaciona cu entre otro reforma financiero, con pa reforsa e aparato gubernamental y tambe Aruba su estado di derecho.
E sesionnan lo ta dirigi riba contenido pa traha e siguiente agenda di ehecusion, pero tambe e lo ta dirigi riba metodonan di planificacion cu yama “theory of change”. Asina lo kier conecta e diferente reformanan cu e vision nacional pa e proyectonan y e reformanan ta cuadra cu e vision di locual cu Aruba tin su dilanti.
TWO-AUA
E ekipo local a expresa cu ta importante pa e dialogonan aki tuma luga pa asina hunto por yega na palabracionan entre Aruba y Hulanda acerca di e reformanan. Teniendo na cuenta loke ta importante pa Aruba y tambe pa haya sa unda tin mester di mas colaboracion . E temanan cu lo trata den e diferente sesionnan ta enfoca riba temanan specifico incluyendo enseñansa, desaroyo economico, mercado laboral y social.
Den transcurso di siman lo duna mas informacion di e trabounan specifico cu ta wordo haci.
