Den cuadro di esfuersonan pa baha prijs di awa y coriente
Durante Conferencia di Prensa di Gobierno e siman aki, Minister di Labor, Energia y Integracion Glenbert Croes a elabora riba e su biahe recientemente pa Ecuador. Tabatin varios reunion cu a tuma luga, entre otro cu Minister di Energia y Minas di Ecuadro Dr. Fernando Santos Alvite y Vice Minister di Hydrocarburos Ruben Dario Espin y PetroEcuador su ehecutivonan. E reunionnan a bay positivo y den bon ambiente.
Minister Croes a splica cu aña pasa e tabata na Ecuador na unda cu el a reuni cu e Minister encarga cu energia e tempo ey, cu e proposito pa sondea posibilidadnan cu por resulta den un reduccion di prijs di awa y coriente pa Aruba. Considerando cu e meta di gobierno di Aruba ta pa baha prijs di awa di coriente, e ta encera cu Minister Croes ta haci e maximo esfuerso unda cu ta sinti cu tin oportunidad pa logra acuerdonan cu por beneficia pueblo a traves di reduccion di prijs di awa pa henter comunidad.
En bista cu Ecuador su compania nacional di petroleo PetroEcuador ta suministrando Aruba HFO pa un paar di aña caba, a traves di algun intermediario, a ricibi e conseho pa sondea posibilidad pa elimina e intermediarionan. Haciendo esey, Aruba a traves di RdA y FMSA por cumpra HFO direct di PetroEcuador. Unabes cu ya no mester paga comision na intermediarionan, FMSA logra obtene e HFO cu descuento compara cu locual ta pagando pe awo na Aruba. Consecuentemente WEB tambe lo ricibi e descuento cual WEB lo por traspasa pa pueblo door di baha prijs di awa y coriente, Minister Croes a splica.
Gobierno ta consciente di e preocupacionnan den comunidad pa locual ta e costo di bida cu ta halto. Pa e motibo aki a continua cu e esfuersonan cu por conduci na reduccion di prijs di awa y coriente cual ta fundamental pa logra alivia costo di bida pa henter comunidad.
Pa e motibo aki a haye importante y a haci e maximo esfuerso pa bolbe reuni cu mandatarionan y ehecutivonan na Ecuador, cual a tuma luga recientemente.
Minister Croes conhuntamene cu sr. Edison Briesen Presidente di hunta di comisario di RdA, Presidente di hunta di comisario di TDA, y consehero di gobierno di riba e tema aki, a bay Ecuador pa reuni cu e Minister nobo Fernando Santos Alvite y e Vice Minister di Hydrocarburos Ruben Dario Espin Zapata. Na e ocasion, a wordo acompaña tambe door di Consul General di Hulanda na Ecuador Diego Almeida
Guzman. Minister Croes a expresa di ta hopi agradici pa e apoyo cu a ricibi di embahada di Hulanda, pasobra pa Aruba e plataforma diplomatico di embahada di Hulanda ta instrumental pa habri e portanan y mustra e seriedad di e intencionnan di Gobierno di Aruba pa cualkier Pais cu busca acercamento cu ne, den e caso aki Ecuador.
Durante di e reunion a wordo treci dilanti e boluntad di Gobierno, Ministernan di Ecuador y di PetroEcuador pa coopera cu e solicitud di Aruba pa por logra un relacion directo entre e companianan Nacional. Den e caso aki, pa RdA y FMSA por cumpra e combustibel cu WEB mester directamente for di PetroEcuador sin cu mester haci uzo di intermediario. Pues pa companianan di estado no tin pakico uza intermediario manera ta e caso awor aki cu Aruba ta cumpra di un compania, cu ta cumpra di un compania, cu ta cumpra di PetroEcuador. Door di elimina e dos ‘schakelnan’ aki, e ta spaar pueblo di Aruba hopi placa cual ta permiti WEB pa baha prijs di awa y coriente.
Adicionalmente, Minister Croes a bisa cu como cu RdA y FMSA ta 100% di Pais Aruba, e Minister a urgi PetroEcuador pa no laga nos companiana participa den un “tender” manera cualkier otro compania priva, pero pa e negociacion tuma luga directo buscando terminonan husto y balansa cu un win-win pa Ecuador y pa Aruba. Concluyendo, Minister Croes a enfatisa cu e reunionnan a bay den bon ambiente y Aruba a wordo bon ricibi door di Ministernan Fernando Santos Alvite y Ruben Dario Zapata.