E pueblo Arubiano cu hopi curashi ta ‘Figura di Aña 2022”

Aña 2022 ta yegando su final y ta un tradicion cu hopi medionan di comunicacion y medionan social, cu ta nombra nan Personahe di Aña, dunando reconocimento na e trabou cu e hendenan aki a haci den curso di e aña cu ta tras di lomba

Pa 2022  nos kier a haci un cambio den esaki, ya cu ora cu analisa desaroyonan den 2022, tin cu conclui cu e aña cu ta cabando, ta un aña dificil pa hopi hende, pa henter un pueblo cu a ser confronta cu contratiemponan ocasiona pa desaroyonan den mundo pero tambe aki na Aruba.

Principalmente e desaroyo economico a causa impacto riba tur nivel den nos  comunidad, for di nivel gubernamental, social, salud, educacional y hudicial, tabatin desaroyonan hopi serio  y hopi pisa.

Tur ciudadano, den un forma of otro, a wordo confronta cu situacionnan cu nan mester a soluciona, uno mas facil cu e otro pero por general nos tin cu mustra cu hopi ciudadano a  ser confronta cu situacionnan hopi complica.

Un aña caminda riba nivel di salud nos a mira e cantidad di hendenan cu a wordo diagnostica cu cancer, otronan cu problema di curason y tur esaki mientras cu e servicio medico mester a reduci su gastonan. Cifra di fayecimento ta mas halto cu otro añanan.

E presion enorme cu tin for di Hulanda riba gobierno di Aruba, exigiendo cosnan cu aya na tera friu  ta posibel pero aki na Aruba e situacion ta diferente y solucionnan ta diferente y cual a trece hopi contratiempo y mas presion pa henter pueblo.

Manera semper sinembargo, Aruba como un pueblo uni a lanta tur dia pa confronta e retonan aki,  hopi  di nan relaciona cu inflacion, cu trabou y sobrevivencia den momentonan duro cu ta afectando tur hende.

Na vispera di un aña nobo, pueblo di Aruba ta trahando cu e conviccion cu tur cos lo drecha, cu tin un miho futuro, cu tin perspectiva cu cosnan lo drecha pero tambe pueblo ta keda cu mesun determinacion pa atende cualkier situacion dificil cu presenta den su caminda.

Como pueblo cu a caba di Sali for di un crisis di pandemia, cu a enfrenta resultado di un  confrontacion arma na Europa, cu a sufri e consecuencianan di aumento di prijs di gasolin y diesel door di un crisis petrolero pa mesun motibo di e crisis entre Rusia y Ukraina,  den 2022 nos hendenan a lanta tur dia y haci lo miho  den nan alcance, pa nan por supera cualkier obstaculo y sigui dilanti cu frente na laira cu hopi determinacion cu mañan lo ta miho.

Sin duda un pueblo asina determina, asina pasivo den su lucha pero cu e conviccion di por supera tur e obstaculonan cu tin na caminda ainda, sin duda ta un pueblo cu merece tur reconocimento, tanto pa su determinacion di superacion como su insistencia pa pusha padilanti y drecha lo tin cu wordo drecha, supera loke tin cu wordo supera pa asina alcansa e exitonan cu henter pueblo ta desea, tanto den seno familiar como riba nivel nacional.

Na boso tur, pueblo balente, ricibi e  reconocimento aki di ta “Figura di Aña 2022” pa boso curashi demostra bou di tur circunstancia y pa boso pasenshi y siguransa cu den e aña nobo, cosnan lo cambia y cosnan lo ta diferente. Un felis cambio di aña pueblo di Aruba ta deseo di e team di EA News y directora Farrah Boekhoudt. Danki pa scoge nos como bo plataforma pa informabo tur loke ta pasa na Aruba, Boneiro,Curacao, St Maarten, Saba y St Eustatius. Caribe ta NOS !