Lo kontinuá e lansamentu eksitoso di un eko-kampaña ku ta enkurashá eksplorashon di nos planeta ku futuro ekspedishonnan
Na aña 2022 Boneiru a reklutá un tim di persona konsiente di medio ambiente pa partisipá na e kampaña inovativo di Earthonauts. E programa ku ta invitá bishitantenan pa registrá, no solamente pa haña eksperensia i eksplorá, pero tambe pa hasi trabou boluntario na Boneiru, a keda desaroyá komo un rekordatorio ku ainda a sobra sitionan bírgen pa eksplorá riba nos propio planeta.
Biaheronan interesá a manda vídeo riba JoinTheEarthonauts pa risibí un biahe pa Boneiru kompletamente pagá, pa yuda ku e esfuersonan lokal pa preservashon di naturalesa durante eksplorashon di e promé Blue Destination na mundu. E kuater último Earthonauts ku nan a selektá pa e mishon híbrido di boluntario pa aventura i biahe, a konsistí di hende ku ta skirbi blòg tokante biahamentu, diseñadó digital i un studiante PHD di Siensia Marino. E tim a duna asistensia na proyektonan importante, manera investigashon di palu di mangel, kultivo di mata lokal i plantamentu di koral, i nan a yuda ku preparashon di e Festival di Planta Palu anual di STINAPA, un evento kaminda ta invitá alumnonan di grupo 5 pa planta palu den Parke Nashonal Washington Slagbaai. Banda di esaki nan tabatin oportunidat pa bishitá e isla inhabitá i protehá Klein Bonaire, kaminda nan a yuda protektornan di naturalesa ku kombatimentu di kresementu invasivo.
‘Den e tempu di ekstremo akí kaminda turismo espasial a bini na moda, komo hende nos ta ripará ku mas i mas nos ta separá nos mes for di nos mundu’, segun Troy Dunn, fundadó i presidente di Dunn&Co, e ofisina di merkadeo di Boneiru tras di e kampaña. ‘Meta di introdukshon di e programa di Earthonauts tabata pa trese hende den kontakto atrobe ku naturalesa i kòrda nan kon nesesario ta pa nos kuida i apresiá e bunita planeta ku aktualmente nos ta biba riba dje – algu ku semper Boneiru a duna prioridat na dje. Ku e promé biahe akí e biaheronan a kuminsá ku un aventura ekstraordinario ku na kaminda a laga nan sera konosí ku kultura, kushina i e bunitesa natural di nos isla.’
Pa tira un bista tras di kòrtina di e aventura inougural di Earthonauts, bo ta bai na @BonaireIsland pa e vídeonan ku Dunn & Co a traha i ku ta kompartí un resúmen di e eksplorashon eksitante, huntu ku storianan personal di kada un di e partispantenan. E programa di Earthonauts tin dos meta: na promé lugá pa duna honor na nos isla i su esfuersonan pa preservashon di naturalesa. Na di nos lugá pa kòrda biaheronan ku ainda mundu tin asina tantu di ofresé. Ta trahando riba plannan pa mishonnan den futuro, mirando ku Boneiru ta dediká su mes kompletamente na promoshon di inisiativanan turístiko mas sostenibel i ta mira su mes komo un embahador pa henter nos planeta.
