E conferencia cu a tuma luga riba nos isla entre 18 cu 21 di September, a culmina Diahuebs anochi cu un celebracion special na Royal Aruba Aloe. E prome conferencia di Aruba Global Travel a trece hunto un total di 59 participante for di Merca, Colombia, Italia, Spaña, Mexico, Suiza, Brazil, Argentina, Chile y Paraguay, pa menciona algun. Banda di hopi otro socio representante di nos hotelnan tambe a biaha pa tey presente. Un total di 70 a bishita nos pa e conferencia aki.
Ta pa prome biaha cu A.T.A. a combina e mercadonan mas clave pa nos isla, esta Norte America, Latino America y Europa den un solo conferencia. Durante henter e siman, participantenan y socionan di mundo di turismo a goza di intercambionan productivo. E programa a cuminsa Dialuna anochi cu un ceremonia di apertura, sigui pa presentacionnan clave Diamars mainta durante di e Global Travel Conference den cual A.T.A. a comparti e resultadonan anticipa pa 2023 y e strategianan primordial pa 2024.
Entre otro a pone atencion na e “E Efecto di Aruba” – e capa di promocion y strategia di comunicacion internacional pa Aruba. Por menciona cu e concepto presenta a ricibi un impacto positivo entre e invitadonan. Tambe a para keto na High Value, Low Impact cu ta inclui calidad di bida di e residente, calidad di experiencia di e bishitante, proteccion y conservacion di nos naturaleza, y contribucion economico na e sector turistico, forzanan interno y externo manera seguridad, aumento di kamber, forza laboral, y Carrying Capacity. Hunto cu esaki por a conta cu un panel den e mercado di Niche cu a inclui gastronomía, naturaleza, y boda.
E programa a continua cu un Mercado Turistico (Marketplace) cu a tuma luga Diaranson pa e mercado di Latino America, y Diahuebs pa e mercado di Norte America. Durante e evento interactivo aki, participantenan a reuni cu ehecutivonan local den turismo. E Mercado Turistico a conta cu participacion di mas di 35 socio local, entre otro hotelnan, companianan di tour y otro operadornan turistico. Cada un di socionan aki tabata tin espacio pa 20 cita pa dia cu ehecutivonan internacional, caminda cu por a explora oportunidadnan di negoshi y establece relacionnan duradero.
Aparte di e reunionnan programa, invitadonan internacional por a goza di diferente experiencia rond di nos isla. Di e forma aki, a percura pa nan tin un bon impresion di e isla y pa nan ta bon informa tocante e producto turistico y futuro desaroyo.
E reaccion pa e prome edicion di e Aruba Global Travel Conference ta sumamente positivo, tanto cerca stakeholders local como tambe cerca e participantenan internacional, cu a inclui varios persona cu ta bishita Aruba pa promer biaha. A.T.A. ta optimista cu e conferencia aki lo sirbi como un plataforma importante pa yuda nos isla logra metanan stipula, crea oportunidadnan nobo y asina enrikece nos mercadonan turistico, pensando aki riba diversificacion di nos mercadonan tambe.
A.T.A. ta extende palabra di gratitud inmenso na e ekipo cu a traha duro riba e evento aki y na tur socio local, incluyendo AHATA, cu a contribui pa haci di e conferencia aki uno grandi y exitoso.
