Tourism Corporation Bonaire (TCB) ta orguyoso di por mantené su tradishon di hopi tempu kaba, kaminda pa medio di e Programa di Bonaire Friends ta honra hendenan ku a duna un kontribushon supstansial na Boneiru su sektor turístiko. E inisiativa akí ta sirbi komo un homenahe na personanan ku konsistentemente a duna muestra di un dedikashon eksepshonal i un personalidat kaluroso i hospitalario, ku ta enrikesé e eksperensia general di nos bishitantenan.
Ku hopi plaser nos ta laga boso sera konosí ku algun persona remarkabel ku resientemente a subi nos lista di Bonaire Friends:
Ginella Martinus
Ginella ta sinónimo pa servisio ekselente i un tremendo personalidat. Mesora nos bishitantenan ta ripará i apresiá su dedikashon pa garantisá nan un eksperensia inolvidabel di vakansi. Den forma konsistente kada biaha Ginella ta dal un paso mas aleu pa por kumpli ku nesesidat di kada bishitante. Su sonrisa kontagioso i su konosementu amplio di Boneiru ta kontribuí na un kaluroso bon biní pa su wéspetnan.
Joan Obispo
Joan su dedikashon na konservashon di e naturalesa bírgen di Boneiru realmente meresé hopi elogio. “Joan a laga mi kasá i ami mira kon fantástiko bonerianonan ta i henter siman el a sòru hopi bon pa nos i pa henter nos grupo.” E no ta destaká solamente den dunamentu di orientashon di buseo, pero tambe aktivamente e ta promové maneho manera e sistema di ‘Kòrá, Oraño i Bèrdè’ pa konservashon di nos refnan. Su servisio na kliente, su manera di laga mira kiko ta nifiká traha duru i su pashon sinsero pa bienestar di nos isla ta ehèmpelnan di e tipo di empleado ku kada empresa ta soña di dje.
Emma Sint Jago
Emma i su amigu- i amiganan ta anfitrionnan ekselente ku por konta ku entusiasmo i rèspèt tokante e patrimonio kultural riku di e Kas di Chich’i Tan. Nan storianan i nan presentashonnan muzikal ku nan grupo di músika i kanto Tutti Frutti ta ofresé un bista fasinante den historia i tradishonnan di Boneiru loke ta laga bishitantenan enkantá.
Baukje Wassenaar
Baukje no ta sobresalí solamente komo instruktor di buseo, pero e ta amplia su hospitalidat tambe pa medio di hasi rekomendashonnan balioso pa eksplorashon di nos isla. Su pasenshi i su disponibilidat pa kontestá numeroso pregunta, den un forma briante ta mehorá eksperensia di e wéspetnan ku ta bishitá nos isla pa promé biaha. Su kaluroso bon biní i guia a pone un stèmpel riba Boneiru ku no ta kita nunka mas.
Valerie
Valerie su abilidat pa pensa rápido i su dedikashon tabata un yudansa na momentu ku un di nos bishitantenan a eksperensiá un problema ku su ekipahe. Den un forma inkansabel Valerie a yuda pa tuma kontakto ku aeropuerto i pa sòru ku a saka e remedinan ku nan tabatin mester di dje for di den e tas ku a pèrdè. Su akshonnan rápido a hasié un berdadero salbadó di bida di hende.
Martijn i Sabine
Martijn i Sabine ta sòru pa un kaluroso bon biní na Boneiru i nan ta kompartí un kantidat grandi di konseho i rekomendashon pa eksplorashon di e maravianan di nos isla. Nan hospitalidat ameno i akohedor ta sòru ku bishitantenan ta sinti nan mes mesora na kas i nan sugerensianan balioso ta sòru ku kada bishitante por eksperensiá plenamente e bunitesa ku Boneiru tin di ofresé.
Jamie Erkelens
Jamie su presensia na Mezze ta sin mas eksepshonal. E ta radia kariño, amabilidat i hospitalidat i di e manera akí e ta krea un eksperensia inolvidabel di komementu. Su atenshon pa detaye, su servisio i atenshon personal, manera personalisashon di pakete di kuminda pa bai kuné i e echo ku e ta keda kòrda wéspetnan ku bini bèk, ta hasié un berdadero embahador di Boneiru i un prenda pa keda tesorá.
Tur e hendenan akí, huntu ku otronan, ta forma e kurason di e Programa di Bonaire Friends i ta representá Boneiru su karakter amabel i humano.
Aparte di selebrá e personanan ku ta destaká akí, nos ta invitá nos bishitantenan pa kompartí nan propio storianan remarkabel ku nos komunidat lokal riba e página spesial di Bonaire Friends riba https://bonaireisland.com/bonaire-friends. Tourism Corporation Bonaire ta ekspresá su mas sinsero apresio pa tur e habitantenan fantástiko di nos isla pa nan kaluroso hospitalidat i nan dedikashon insesante na éksito di nos sektor turístiko. Nos ta invitá tur hende pa huntu ku nos honra e lasonan spesial i e amistatnan pa bida largu ku a sera na Boneiru.
