Parlamento di Aruba a trata presupuesto di Aruba y na unda cu Minister di Finansas Xiomara Maduro a presenta un nota di cambio. Na prome instante a entrega un presupuesto cu un deficit di 25 miyon florin. Gobierno a keda traha pa asina por haci cambio necesario pa asina entre otro por haya reduci e deficit y tambe pa por revisa e gastonan di gobernacion pero tambe teniendo na cuenta pa e entradanan por wordo adapta na locual ta e crecemento economico cu pais Aruba ta spera den e proximo aña.
Minister Xiomara Maduro ta duna di conoce cu tur esaki ta cambia e presupuesto cu e keda entrega na parlamento. Pero manera a keda treci padilanti caba despues di 15 aña ta logra entrega presupuesto di pais Aruba na tempo conforme nos leynan dia prome di September, pesey for di prome di September pa awor aki tin cierto cambionan cu ta importante.
E cambionan a keda poni den un sistema grafico unda cu ta refleha y pone e informacion di mas importante di e presupuesto den un grafico pa asina no solamente parlamento pero tambe pueblo di Aruba por haya y sigui esaki.
Minister Xiomara Maduro den parlamento a pasa riba e nota di cambionan cu a tuma luga den e presupuesto y ta duna di conoce cu e informacion mas importante den e cambionan aki ta cu a logra yega na un saldo financiero di 1 % di surplus, despues cu Pandemia a dal nos pais grandemente y cu despues na 2019 a logra un surplus chikito di 4 miyon florin.
Despues e pandemia a hiba nos na un deficit di 1028 miyon florin caminda cu a cana un caminda cu no tabata facil unda cu esfuersonan grandi a keda haci y ta gradici e team cu a asisti mi persona pa por logra e trabao aki y cu por presenta e cambionan pa presupuesto di Pais Aruba por conoce un surplus di 1 % cu ta ekivalente na 63 miyon florin.
Minister di Finansas Xiomara Maduro a pasa den e cambionan cu a hiba na locual cu ta bira e saldo financiero aki na 1 %. Segun Minister Xiomara Maduro e 1 % tabata e discusion cu tabatin ultimamente na nivel di supervision financiero pero tambe na nivel di Reino caminda cu tabatin na December 2021, caminda cu Gobierno di Aruba mester a prolonga locual cu ta bira e supervision financiero y hunto cu ne a prolonga e normanan di cual tabata den combersacion ainda riba nan, pero cu tur e presion cu a bini mester a firma pa prolonga esaki pa no bin un bashi den locual ta e supervision financiero, pero di otro banda cu protocol of sin protocol gabinete Wever Croes a demostra seriedad na momento cu ta trata di finansas publico na Aruba.
Segun minister Xiomara Maduro desde e prome momento cu a asumi e responsabilidad como gobernacion Gabinete Wever Croes, pero tambe como minister encarga cu finansas a trata na un manera serio unda cu e yega na un protocol na 2018 y a tene nos mes y prome cu ora na 2019 caba Gabinete Wever Croes a yega na un surplus pa Pais Aruba y na e momentonan ey tabata despues di 12 aña cu Pais Aruba a conoce un surplus bek.
E surplus tabata uni chikito di 4 miyon, pero surplus ta surplus. Despues di esaki e intencion tabata pa yega den sala di parlamento pa presenta un presupuesto cu un surplus cu 46 miyon florin na Februari 2020, a yega parlamento pa trece e presupuesto eynan, pero na Maart 2020 pandemia a drenta na Pais Aruba y a laga atras un deficit grandi pa nos pais. Minister Xiomara Maduro ta duna di conoce cu tres aña a traha bao di hopi hopi presion, pero e energia di Gabinete Wever Croes semper tabata dirigi na bienestar di Pais Aruba. Ora cu bo ta traha y cu realmente bo ta stima bo pais no tin mester di presion di pafo pa bo sa kico ta bon pa bo pais. E presion cu ta sinti di paden ta esun cu ta bay ponebo logra pa bo pais. E presion di paden ta traduci su mes den e amor pa e pais aki ta locual cu a pone awe cu Aruba por yega den un situacion di surplus.