Diadomingo ultimo 27 september den e museo Bonnefanten na Maastricht Hulanda , Alfrida Martis Boneriano biba na Hulanda a wordu invita pa batisa e ekshibishon internashonal di e seru di salu di Bonaire ku ta obra di arte di e artista Patricia Kaersenhout. E seru di salu di mas ku 4ton di salu di Bonaire ku lo ta parti di un eksposishon di un grupo di artistanan internashonal “Say it Loud”, ku nan obranan ta relashona ku diversidat, pasado kolonial I e imagen I interpretashon di esaki.
Patricia Kaersenhout ku ta krea obranan artistiko visual, ta un aktivista kultural di desendiente Surinamenjo den su trabao ta investiga e diaspora Afrikano den relashon ku entre otro rasismo I historia di sklabitud. Riba I juli 2016, dia di konmemorashon abolishon di sklabitud pa prome biaha a realisa e obra visual “e alma di salu” aki na Amsterdam ku a simbolisa e liberashon mental I fysiko pero ku tambe ta referi na e krusada di oceano Atlantiko di esnan hasi katibu riba ruta pa e plantashinan. Pero tambe e ta simbolisa e salu di tur e awanan di wowo ku a wordu drama durante sklabitud I kolonialismo ku ta e sufrimentunan pero tambe nan speransa I sonjonan.
E evento aki “e alma di salu” ku na 2018 na Palermo, Italia a wordu dedika na e refugiadonan di Syria I Afrika e anja aki ta wordu dedika na Bonaire ku salu for di Bonaire, den solaridat ku Nos Ke Bonaire Bek, kaminda lo pone atenshon na e komportashon grosero di gobierno Hulandes. Hulanda ku ta rekolonisando bek e islanan den Karibe, e desigualdat angustioso I tur esnan ku ta luchando den e tempu di Corona-krisis aki pa tene nan kabes riba awa.
Riba e plachi di informashon ofisial tokante e obra di arte di Patricia Kaersenhout ta skirbi:
E lensu ta na benta den shop di e museo. E ganashi pa un parti lo bai pa NKBB, e grupo di akshon Boneriano ku ta luchando pa outodeterminashon I outonomia di e isla. I e otro parti ta bai na famianan na Bonaire ku a wordu asota pa e krisis di korona. Kaersenhout ta deklara ademas ku mas ku mitar di Bonerianonan ta bibando bao di limite di pobresa. Dor di e krisis di korona pobresa riba e isla a bira mas grandi.
E fragementu di e kantika di salu di katibunan di siglo 19 riba e lensu ta: no mas pinchi di salu pa mi, no mas, no mas, no mas pinchi di salu pa mi, hopi miles a bai …
Fundashon Nos Ke Bonaire Bek ta gradisi Sra Patricia Kaersenhout I e eksposishon di artistanan internashonal “Say it Loud” I Sra Alfrida Martis di Caribbean Ancestry Club ku a lesa fragmentonan di e karta di NKBB despues di e referednum di 2015 kaminda ku mas ku 65% di e pueblo a rechasa e aneksashon illegal, pa nan muestra di solidaridat na e pueblo Boneriano pa pone atenshon riba e situashon di rekolonisashon dor di gobierno Hulandes di nos isla ku ta un grave violashon di derechonan humano di outodeterminashon di e pueblo Boneriano.
