Director di Algemene Ziektekosten Verzekering (AZV) Edwin Jacobs a yama un conferencia di prensa pa presenta e relato anual di AZV na comunidad di Aruba despues cu e la keda entrega na Minister di Salud Dangui Oduber.
Na momento cu e la keda entrega na e mandatario concerni esey ta significa cu e la pasa den henter e proceso interno y por informa comunidad di Aruba riba e fondo asina importante pa Aruba. E fondo di gasto di seguro medico general di Aruba AZV lo ta disponibel tambe riba e website di AZV unda cu tur hende por tin acceso y por mira esaki tambe.
Segun director di AZV Edwin Jacobs loke cu a resalta un poco den aña 2023 cu ta di relevante pa cuido pero tambe pa fondo di AZV ta un surplus chikito den 2023 unda cu a logra un surplus di 7 miyon florin cu na comienso di aña a anuncia esaki. Na februari a sigui un reunion importante cu e colegio di supervision CAFT hunto cu minister di salud y den e reunion ey ya caba e mandatario a ricibi for di AZV e conseho cu e 5.5% di recorte cu tabata aplica riba e tarifanan y e presupuestonan y e lumpsum no ta sostenibel mas mirando e recuperacion economico cu Aruba tin.
Segun director di AZV no por uza e motibo di pandemia mas como motibo pa haci e recorte y mester cuminsa na pensa pa trek e parti aki aden. Den e reunion cu CAFT minister di salubridad publico a menciona cu e ta pensando den e direccion aki, pero CAFT a expresa su preocupacion cu por tin un impacto grandi riba e gastonan di AZV. Na e momento ey minister a duna AZV e tarea cu no por surpasa e locual cu a presupuesta pa 2023 pa loke ta trata gastonan cu ta na 475 miyon florin, esaki e bira e prome blafon cu a wordo poni pa AZV cu no mag di surpasa. Segun director di AZV esaki ta bira e manera den e proximo añanan cu AZV lo bay maneha e diferente blafon di gastonan.
Prome di mey 2023 cu ta eliminacion di recorte di 5.5% den un conferencia di prensa minister di salubridad publico a menciona caba cu diferente tarifanan a bay bek na normalidad, lumpsum a bay bek na normalidad dia prome di mei 2023. Esaki tabatin un impacto di 14.5 miyon florin riba e fondo.
Hopi importante tabata cu bao auspicio y impulsa pa ministerio di salud y minister di salud publico a trece e dunadonan di cuido hunto cu ministerio pero tambe hunto cu AZV pa asina logra cera un acuerdo cu por wordo considera historico cu ta e zorgakkoort cu a keda firma na juli 2023, e sector a delinea den bista di e demanda cu ta pre mira den e proximo añanan, a delinea e espacio nan cu ta e areanan den sector di cuido cu lo mester haya atencion inmediato y tambe den termino medio y largo.
E zorgakkoort lo ta bay ta e base pa sigui fortifica nos sector di cuido cu e meta pa por cumpli cu e demanda cu ta pre mira cu ta bay tin for di nos poblacion pa loke ta trata servicio di cuido medico. Hopi importante tabata cu na 2022 a yega na e conclusion cu e recorte di 60 miyon florin cu a keda impone riba nos den e cuadro di e prestamo cu a haci pa pandemia no lo yega na dje debi cu no tin espacio pa cu esaki.
Sinembargo a propone pa bin cu un instrumento diferente y nobo pa nos por guia e gastonan y asina a desaroya den 2023 cu un grupo di expertonan local cu a logra diseña un modelo cu ta un instrumento como cuadro financiero multi anual como e instrumento pa bay guia e crecemento di gastonan den cuido den e proximo añanan.
Segun director di AZV Edwin Jacobs esaki a keda entrega na november na gobierno di Aruba, pero tambe a presenta e modelo na staatsecretaris cu a keda impresiona cu den un corto tempo a desaroya un instrumento asina importante.
Den cuido medico semper tin innovacion y tambe a introduci Arubahelp app cu na november a keda formalisa y lo trece hopi cambio y transparencia y accesibilidad pa e aseguradonan na cuido y na su informacionnan. Loke cu ta resalta hopi ta cu e empeño cu e sector di cuido medico ta haci pa asina tur aña pa tur e aseguradonan haya e cuido cu nan tin derecho riba dje y e cuido cu ta necesario.
