E di tres edishon di e dia habrí na e proyekto pa promové agrikultura, krio di bestia i piská a hala sentenáres di hende. E echo ku hopi turista tambe tabata presente na e evento, ta pasobra a hasi promoshon aktivamente pa e dia habrí na hotèlnan i risòrtnan. Asina turistanan por a bin purba kiko Boneiru tin di ofresé riba tereno di agrikultura, krio di bestia i kultura.
Ku esaki Boneiru ta disponé di un atrakshon mas, kaminda kulturanan i generashonnan ta bini huntu. E interes pa kultivá propio bèrdura i fruta kada biaha ta bira mas grandi i por a ripará esaki durante e último tres dianan habrí. Ku e dia habrí LVV ta guia e bishitantenan den e mundu di agrikultura i e kultura boneriano. E demonstrashonnan a siña e bishitantenan tokante kon pa kultivá mata, fermentá desperdisio di kushina, kultivá ‘dragon fruit’, kria bestia i kushiná diferente kuminda krioyo. Di e manera akí a lanta interes serka e bishitantenan pa purba hasi esaki na kas mes tambe. E bishitantenan por a akudí na e stèntnan pa kumpra mata, kos di boka dushi i kuminda krioyo, kos di bebe trahá na kas i asesorionan pa kas. Naturalmente tabatin sufisiente kos pa e muchanan tambe hasi.
E dia habrí pa un ratu a rebibá rekuerdonan di e Boneiru di ántes. Ku músika boneriano i aktuashon di Foyan Boyz i un ‘jamsession’ esaki tabata un fiesta típiko boneriano. Banda di esaki señora Gacha Coffie di Rincon a bin demonstrá kon ántes nan tabata kushiná kadushi. Ku hopi atenshon e bishitantenan a opservá kon ta pela e kadushi, pa despues batié pa hasié moli riba piedra. Naturalmente nan por a purba e kuminda tradishonal akí. Aunke kadushi ta konosí ta Boneiru, tabatin bishitante ku pa promé biaha a purba esaki.
Maurice Adriaens, lider di proyekto di LVV, ta hopi satisfecho tokante kon e dia habrí a kana. Ku e dianan habrí mas i mas e ke inkluí e elemento di kultura di Boneiru. Naturalmente LVV ke gradisí tur hende pa nan aporte na e éksito di e dia habrí akí. Un palabra di gratitut ta bai tambe pa e bishitantenan i e doñonan di stènt pa nan presensia ameno. Un danki spesial ta bai pa e tim di LVV, señora Gacha Coffie ku a kushiná kadushi, Saeed di LVV ku a ofresé e tayer tokante trahamentu di tera pa mata i e tim di Selibon.
LVV ya kaba ta anhelando e di kuater edishon di nan dia habrí i nan ta apresiá sugerensianan pa hasié mas mihó ainda.