E lucha contra violacion di derecho humano y derecho di autodeterminacion di pueblo di Boneiro ta sigui

Diamars awor 5 di september pa 7 or di anochi Movemento Causa Prome ta invita pueblo na su sede pa un encuentro informativo cu e Defensor di  Derecho Humano na Boneiro, presidente di “Fundacion Nos Ke Boneiro Bek”, honorabel activista James Finies.

For di 2010, ora a disolve Antia Hulandes,  sr. Finies ta hibando un campaña, contra violacion di derecho humano di pueblo Boneriano, cu a keda integral den Hulanda como entidad publico sin derecho igual. E poder politico a bin cay den man di gobierno Hulandes.

Pa sr. Finies e tomo di poder aki ta un acto neocolonial cu ta viola e derecho di soberania di pueblo di Boneiro. Cu entrada di Hulanda a cuminsa e proceso di destruccion di cultura, identidad y idioma di Boneiro. Ademas e ta nifica apoderashon di recursonan natural di e isla.

Hunto cu Davika Bissessar-Shaw activista presidente di e Organisacion di Derecho Humano di Boneiro (BHRO), James Finies a inicia na aña 2022 un crusada internacional cu a dura 495 dia. Nan a bishita paisnan den Latino Amerika y Caribe y tambe Nacionnan Uni. Tabata un mision soberbe di conscientisacion buscando comprension y solidaridad pa finalmente logra haña Boneiro riba lista di “Teritorionan Sin Gobernacion Propio” di Nacionnan Uní.

Diamars proximo sr. Finies ta na Corsou. E lo duna informacion na pueblo di Corsou i na Bonerianonan biba na Corsou tocante e crusada exitoso di 495 dia. E lo duna tambe informacion riba status di e proceso pa pone Boneiro riba e lista di “Teritorionan Sin Gobernacion Propio” di Nacionnan Uni.

Algun logro concreto di e crusada ta:    

Asociacion como miembro asocia di e Comision di Reparacion di CARICOM,

Status Special Consultativo di Conseho Social y Economico di NU,

Presentacion di BHRO na e Foro Permanente di Hendenan di descendencia Africano di NU

Movemento Causa Prome ta invita bo cordialmente na e encuentro cu activista James Finies directamente for di Boneiro.

E encuentro ta diamars 5 di september na Sede di Causa Prome, Domingo , Papayaweg 14. Orariota : 7’or pa 9’or di anochi. Entrada ta gratis.

Movemento Causa Prome ta warda bo. E lucha sagrado pa emancipacion di nos pueblonan ta sigui.