Pa selebrá abolishon di sklabitut, SKAL den koperashon ku Biblioteka Públiko Boneiru i e skolnan básiko na Boneiru, a organisá un kompetensia di poesia ku e tema ‘E poder di nos historia’. E ganadónan di e kompetensia di poesia ta: Na di tres lugá a sali skol básiko Het Koraal Bonaire ku un poesia titulá ‘De slavernij – Sklabitut’, ku Nathan, Eloïse i Maxime a skirbi huntu. Na di dos lugá a sali skol básiko Aquamarin ku e bunita poesia ‘Vrijheid – Libertat’ ku Lorelei a skirbi. E promé lugá a bai pa Kolegio San Luis Bertran ku e poesia ganadó ‘Wij zijn vrij – Nos ta liber’, ku Xaishany a skirbi.
Pa e kompetensia di poesia a invitá alumnonan di grupo 8 pa skirbi un poesia ku komo tema ‘E poder di nos historia’. Seguidamente e skolnan mes mester a hasi un selekshon i entregá tres poesia na SKAL. For di e poesianan akí a skohe e ganadónan.
E plan original tabata pa ofresé un tayer di téknika di presentashon na e muchanan. Esaki lo a tuma lugá riba djárason 29 di yüni 2022, pero a anulá esaki pa motibu di sirkunstansianan di wer. Hasiendo un kambio rápido a disidí pa tòg laga e entrega di premio tuma lugá riba djaweps 30 di yüni 2022. Aunke e entrega di premio tabata planiá pa tuma lugá na kompleho deportivo Jorge Nicolaas, e organisadónan a pasa personalmente na e tres skolnan ganadó pa anunsiá e ganadónan.
Entidat Públiko Boneiru ta gradisí e skolnan ku a partisipá pa e kolaborashon eksitoso akí, di manera ku nos muchanan tambe ta para ketu na e pasado di sklabitut di Boneiru.
