E dia habri di ACE Kids Club tabata eksitoso

Dia 4 di september ultimo e clup di arte pa mucha, ACE Kids Club a tene un dia habri den sentro di bario Tera Kora.

Durante di e dia habri aki un total di 20 mucha a partisipa i a gosa un bol. 

E dosentenan di ACE Kids Club a soru pa un programa varia.

E programa a konsisti di tayer di aktuashon, musika i baile. 

E muchanan di un forma masha kreativo a sera konosi ku otro i despues nan a hasi algun ehersisio pa siña traha huntu. Mayornan a tuma informashon di e diferente proyektonan ku ACE Kids Club tin na kaminda. Tabata tin mucha ku a inskribi mesora i otronan a bai pa evalua ku e mucha na kas i pa tuma un desishon. Mester bisa ku ya kaba ACE Kids Club a yama bon bini na 11 miembro nobo i tin espasio pa algun mas. 

Proksimamente den luna di oktober ACE Kids Club ta bai presenta su prome obra teatral ku ta titula “E Palu di Kuenta” Un obra musikal kaminda tin tur e kantikanan di ACE Kids Club huntu ku baile i aktuashon. Tur esaki den un historia kaminda e figuranan Hans & Grietje, Roodkapje, Sneeuwitje, Heks, Wolf etc ta figura. Tur den un historia kambia den un estilo krioyo speshal pa pueblo di Boneiru.

E proksimo proyekto di ACE Kids Club lo ta un “Regalo Pa Pasku”.

Ku lo estrena den luna di dezember. Si bo yu tin kualke talento di balia, kanta aktua, rap, deklama, pinta, obra di man. Nos ta kla pa guie pa e krese den su talento. Banda di esei ACE Kids Club ta specialisa den coaching di mucha pa nan por krese sano.

Pa mas informashon tuma kontakto ku Presidente di ACE Kids Club Segni Bernardina na telefon/whatsapp +599 7965677 of Direktor Artistiko Lilimar Valencia na Telefon/whatsapp +5999 6658177