E siman aki, ekipo di Aruba Tourism Authority a haya un recorido di e proceso di DVG & HOH na aeropuerto pa asina haya un impresion di tur loke ta pasando dilanti y tras di cortina, awe 6 luna despues cu a haci re-apertura di nos frontera. Kico a cambia? Kico ta feedback di e ekipo? etc.
Manera ta conoci, tur bishitante di exterior – dus esnan residencia y no residencia na Aruba – mester yena e ED card online prome cu nan yega nos isla. Esnan no residencia na Aruba mester cumpra nan seguro online y nan mester presenta cu un test negativo di Covid-19 no mas bieuw cu 72 ora prome cu nan yega nos destinacion.
Tambe tin e opcion pa haci e test na Aruba y esaki ta wordo haci na nos aeropuerto mes. Asina e bishitante tin su caminda pa cana prome cu e yega nos destinacion y ta di sumo importancia pa e wordo ricibi na un manera cordial y bon guia den e proceso na momento di su yegada.
UN BON GUIA NA MOMENTO DI YEGADA
Na momento e avion baha, tin un team ta wardando pa yama e bishitantenan bonbini y guia nan pa splica unda nan mester bay, e ekipo di test ta eherce algun control caba eynan den e area di Inmigracion y despues e bishitante por busca nan maleta.
Manera cu nan haya nan maleta, atrobe nan ta wordo guia pa un seccion special na unda e team ta verifica e datonan di e bishitante – sea cu nan por pasa aduana di biaha pasobra nan a presenta un papel cu resultado negativo di Covid-19 of nan mester haci e test e ora ey na aeropuerto. Den e ultimo caso, despues cu bo datonan wordo verifica, e personanan specifico di e instancianan DVG y HOH ta pendiente pa pone e bishitante sinta trankil y ta tuma e test na unda e bishitante despues por sali f’e e portanan di arrivals pa disfruta di su estadia na Aruba pero, den cuarentena mientras cu e ta warda e resultado di test. Tur esaki por tuma te hasta 15 minuut. Pues den corto tempo e proceso na aeropuerto por ser completa, claro dependiendo di e dia y momento.
PROCESONAN NA AEROPUERTO
Pa loke ta trata turismo, e proceso cu e bishitante mester pasa den dje na aeropuerto ta di sumo importancia banda di procesonan cu ta resalta bao aeropuerto mes, tambe departamento di Inmigracion y bao di departamento di Aduana na Aruba. Den caso di e ekipo di DVG y HOH nan tin cu maneha e situacion di Covid-19 tambe y e proceso di testing y otro controlnan cu tin cu wordo eherce pa loke ta trata e parti di salubridad. Diferente instancia a traha hunto pa asina -como parti di e reapertura di Aruba- por tin tur rekisito defini y e ta un proceso cu ta brinda e turista pero tambe e localnan e confiansa cu ta tene cuenta debidamente cu tur loke ta trata e aspectonan pa proteha nos salud y pa brinda e siguridad di e banda eynan.
BISHITA DI A.T.A. NA AEROPUERTO
Den e contexto aki a haci un bishita na e ekipo cu ta trahando di parti di DVG como parti di tur e rekisitonan cu ta resorta bao di nan y a tuma nota di e protocolnan y con nan ta wordo implementa y ki aspectonan a wordo cambia despues di a siña mas di e practica diariamente.
Aruba Tourism Authority a keda hopi satisfecho –no solamente awo cu e bishita, pero durante e proceso pa loke ta trata e procedura y e trabao cu tur esnan concerni ta haci pa por a siña logra pa habri exitosamente pa turismo pa asina Aruba por conta riba e logro den e area eynan. Banda di esaki, A.T.A. a ricibi hopi compliment di bishitantenan y esnan cu ta haci uzo di e facilidadnan di cual bon maneho a yuda aporta na e bon desaroyo y progreso actual di turismo.
Aruba Tourism Authority kier a tuma e oportunidad aki pa gradici e ekipo di DVG na nos aeropuerto y na tur esnan cu ta trahando ‘dilanti y patras di e cortina’ incansablemente, pa a haci di e facilidad di test na aeropuerto un exito rotundo. Tambe kier gradici Hyatt cu a despacha 3 persona pa asisti e ekipo for di mediante di 2020.
