Alcohol ta un droga legal rond mundo, minister demisionario Rocco Tjon ta kere cu mester keda enfoca den conscientisacion. E discucion di alcohol no ta di awo pero anja nan largo ta discuti riba e partiaki. Segun e mandatario tempo e tabata studia na Hulanda e discusion aki tambe a bin riba mesa. Un di e les nan cu tabatin a ser bisa “ si mester elimina alcohol kico lo ta e siguinte pasa si ta considera cu velocidad ta un punto di preocupacion lo limita tur auto pa core 60 KM pa ora?” e mensahe di esaki ta cu na final di dia ta keda na comportacion di e serhumano pa no bebe y core auto, pesey tambe ta kere cu mester sigui crea conscientisacion pa e persona por tuma e miho decision.
Sinembargo tambe mester por trece alternativanan manera programanan cu ta bay keda introduci caminda cu e ciudadano por haci uzo di transporte alternativo si a bebe dimas. Tipo di accion nan asina ta importante pa duna e ciudadano opcion tambe cu si e la bebe mes y e no tin hende pa hiba cas e tin un opcion di yama y por haya un servicio cu por baha e persona te na cas y mañan por bay busca su auto bek. Importante ta pa trafico ta sigur y bo bida tambe ta sigur.
Minister di husticia ta kere cu FADA ta haciendo un tremendo trabou riba e area aki pa crea conscientisacion riba e parti di alcohol, droga y salud mental y ta kere cu mester sigui inverti den e areanan aki.
Banda di esaki no ta un secreto cu FADA y diferente fundacionnan ta conscientisa comunidad di Aruba pa añanan largo, pero di un manera of otro e ciudadano ta keda bebe y stuur. Pesey mes minister di Husticia ta kere cu mester haci un combinacion di strategia unda cu ta keda conscientisa pero na mes momento mester haci cambionan den ley y pone un maneho mas estricto.
