E bebemento di koffie na Landsrecherche di lider di MAS Marisol Lopez Tromp a zona manera un storia di mucha mal skirbi (conta). Un storia cu e mesun Parlamentario mes no ta kere. Pero e pregunta cu esnan cu ta haci den e caso aki ta: Con a para cu e rapport forensico.
Manera tur hende por corda, despues di retiro di Otmar Oduber como Minister, e politico Marisol Lopez Tromp tabata e candidato pa reemplas’e. Sinembargo na caminda pa esaki tabatin algun contratempo. Aunke cu Oduber a anuncia basta adelanta cu e lo retira, y su huramentacion lo mester tabata cla asina cu e dia a yega, esaki no a sosode asina. Marisol a insisti cu e mester bira Minister y a logra na Januari.
Pero como Minister e no a sinta mucho, ya cu e no ta un teamplayer y e tabata un Gobierno riba su mes pa cual na final a pidi’e retira y ora cu e no a cumpli, a dun’e su retiro. Un investigacion cu a cuminsa riba otorgamento di tereno a saca hopi puyito for di e macuto cu tabata den man di Marisol. Lamentablemente niun hende, ni Landsrecherche no ta focus riba loke a pasa den e mas o menos seis lunanan cu e tabata Minister.
Tin un rapport forensico cu ta papia palabra cla y practicamente a pone tur cos cla pa Landsrecherche actua mesora. Pero te dia di awe no ta tende nada di esaki. Parlamento mester ta na altura di e rapport forensico traha door di un compania local y den cual tin declaracion di funcionarionan publico cu a huramenta pa haci nan trabou manera ley ta prescribi. Den e rapport aki por lesa con ley y trahadonan a wordo poni un banda den otorgamento di huurgrond, cu ta un patrimonio di pais Aruba.
Tin un maneho legal stipula pa DIP, cu ta e departamento encarga cu otorgamento di tereno. E ta un maneho cu ta mustra con ta anda cu otorgamento di tereno, y esaki mester ta cu esun cu pidi prome ta haya. Naturalmente tin un tempo fiho pa cumpli cu e rekisitonan aki.
Marisol sinembargo, for di momento cu el a sinta riba e stoel di Minister (RIBA SU TRONO ), a cambia henter e sistema. No pa yuda pueblo, sino pa yuda e hendenan cu e kier. Y esaki ta bon relata den e rapport forensico. DIP tin un seccion cu ta specificamente encarga cu otorgamento di huurgrond. Pero for di momento cu Lopez Tromp a bira Minister, e seccion aki su trabou a paralisa. Tur cos tabata wordo haci na oficina di e Minister y tabata den man di un di e coordinadornan di e mandatario. Nan tabata traha cu nan lista di hendenan kendenan mester a bay na e oficina di e mandatario pa entrega tur nan documentonan. Despues tabata manda e lista pa DIP. Pero no pa esnan cu semper a atende cu huurgrond, sino otro pion poni eyden cu por manipula e situacion na nan fabor. Un persona fiel na Marisol, kende su pareha ta cu e politico aki for di tempo di MEP.
Pues ora cu e tabata Minister tabata duna ordo kendenan mester haya tereno di huur, lagando hendenan cu pa hopi tempo ta wardando, un banda. No solamente esey, den e rapport forensico tin ambtenaarnan a declara cu tin hende cu nunca a haci peticion na DIP mes pa haya un huurgrond. Y direpente Minister ta manda un MB cu nan nomber riba dje. Esaki a causa e tempo ey cu hasta e director Haime Croes a consumi, bira malo y a bay hospital.
E rapport forensico ta cla y OM mester cuminsa bira diligente mescos cu e tabata den otro casonan. Por a mira si cu e caso aki, Aloe of Cucuisa con cu kier yam’e, tin e politico Marisol ta tembla. Por a sinti esaki den su bos ora cu el a sali for di Landsrecherche. Su reaccion ta mustra cu e mes no a kere su storia y cu esaki no ta su ultimo bishita na Landsrecherche. Cu e líder di MAS kisas no kier bisa awo cu e ta un sospechoso di e caso probablemente, tempo lo demostra esaki y e berdad lo sali for di un of otro manera, mirando cu si bo ta sospechoso cambionan den parlamento tambe mester tuma luga debi cu e ora ey Marisol Lopez Tromp no ta digno pa representa Aruba.
E actuacion di Marisol tempo cu e tabata Minister ta mustra con cosnan no mester bay. Ta hustamente pa evita e tipo di manipulacionnan aki den otorgamento di tereno, cu a hinca e maneho den un ley. Di e forma aki tur cos ta sosode di un forma husto. Hendenan ta pidi pa cambio pero ora cu trece cambio ta haya tipo di cosnan aki cu ta wordo haci cu otro pensamento su tras, gana voto den eleccion. Esaki ta hustamente loke cu a pasa cu Marisol Lopez Tromp den e ultimo campaña. El a presenta su mes como “virgen Marisol” pero e diablo su tras niun hende no sa, te ora cu haya sa di contenido di e rapport forensico cu ta den man di autoridadnan.
