Minister Maduro di Finansa ta informa: Departamento di Impuesto a cuminsa paga restitucion di inkomstenbelasting di aña 2022 E atraso di 40 aña porfin ta keda pa pasado.
Na mei 2023 Departamento di Impuesto DIMP a informa comunidad cu e atraso den procesamento di cobransa di “inkomstenbelasting” y primanan social manera AOV/AWW y AZV a pasa pa historia. Cu trabou duro y dedicacion grandi a logra elimina e retraso aki cu a existi pa 40 añanan pa nos Pais. DIMP a sigui di biaha cu e trabounan pa procesa e declaracion di “inkomstenbelasting” 2022 den nan sistema y awor por raporta cu den e prome mita di aña 2023 ya caba DIMP a paga un total di 15.4 miyon florin na restitucion na 8286 persona cu mester haya placa bek di aña 2019, 2020 y 2021.
A cuminsa paga restitucion di aña 2022
E avance grandi aki a trece cone cu tur persona cu ya caba a yena nan “inkomstenbelasting” di aña 2022 y cu no tin otro debe di belasting habri, ya caba ta hayando nan cobransa definitivo y por spera nan restitucion den e lunanan nos dilanti. Cu otro palabra, DIMP ya caba a cuminsa paga restitucion di “inkomstenbelasting” di aña 2022.
Critica baho di Parlamentario Tromp di MAS
Pa largo tempo DIMP a ricibi hopi critica pa e atraso aki, pero a sa di sigui cu nan trabou na un manera profesional pa por logra e metanan stipula. Recientemente hasta Parlamentario Marisol Tromp di MAS a haya ta bon pa a lansa un critica masha baho den direccion di DIMP bisando cu ‘ta primi bala di tur hende pa entrega cos na tempo, anto di bo mes ta añanan atrasa y no ta duna Pueblo su placa bek.’ Minister Maduro ta lamenta cu Parlamentario Tromp pa falta di conocemento, interes of simplemente wega di politikeria, ta scoge pa bagatelisa e esfuerso grandi cu e team dedica di DIMP a haci cu ta dunando su fruto na bien estar di Aruba. Ta di spera cu ora Parlamentario Tromp yena su aangifte di aña 2022 y haya su restitucion cu prioridad como Parlamentario di Pais Aruba, cu e lo sa di aprecia y elogia e trabou haci pa e profesionalnan di DIMP.
Masha danki na e team di DIMP
Minister Maduro di Finansa ta gradici ful e team di DIMP bou liderazgo di Directora Luenne Gomez-Pieters y specialmente esunnan cu a traha di cerca pa resolve e atraso grandi aki, pa e trabou grandi haci na bien estar di Aruba. DIMP tin mas reto su dilanti, pero como mandatario nos ta convenci cu hunto nos lo sa di surpasa e reto nan ey tambe. Masha danki pa kere den Aruba!