E arte di siña

Educacion ta y a cambia hopi durante e ultimo añanan y tin varios estudio cu ta indica con importante e ta pa sigui adapta nos educacion na nos mundo di mayan. Dr. Earney Lasten, Rector di Viamoon Technical College, na Chía Colombia, ta splica E Arubiano News un tiki mas tocante Viamoon, un Technical College unico, na Ingles, serca di cas y accesibel pa tur studiante den Caribe.

Recientemente, redaccion di E Arubiano News a sinta cu Dr. Earney Lasten pa compronde un tiki mas di e idea, concepto y naturalmente e college mes, Viamoon Technical College. Funda e aña aki na januari, Viamoon Technical College ta un scol hoben, bon organiza, cu ta ofreciendo diferente programa na studiantenan di diferente nivel. Segun Dr. Lasten ta splica E Arubiano News, su experiencia extensivo den diferente programa educativo den exterior a dune un perspectiva diferente di cultura pero tambe a lage mira kico e gaps ta, “kico ta falta” den nos sistema di educacion. E conocimento aki, hunto cu su conocimento extensivo den Tourism & Hospitality Management, observacionnan di e mindset di e studiantenan, e factor financiero cu ta hunga un rol grandi den educacion, e seguridad, accesibilidad, calidad y costo di bida a trece Dr. Lasten na e idea di lanta Viamoon Technical College. Dr. Lasten ta splica cu Viamoon ta focus riba programanan mas technico y riba e preparacion di e studiante pa un carrera laboral exitoso. E ta un programa mas liher pa e studiantenan por focus pa un tempo cortico pero na final sali cu un diploma den man y bon prepara pa e lugar di traha. Dr. Lasten ta splica cu banda di e programanan manera Career Technical High School, International Tourism & Hospitality Management, Business Administration, Information Technology, e ta splica cu nan a inclui Disability Studies & Inclusie Real-World Education. Nos a biba den un mundo cu diferente hende cu disabilidad y segun Dr. Lasten ta splica, tin un gap masha grandi den e educacion social humanista unda un studiante ta siña con pa trata personan cu algun disabilidad. Un programa cu sigur ta beneficia tur studiante, pero specificamente e studiantenan cu kier enfoca riba programanan manera International Tourism & Hospitality Management.

Na Aruba, hopi studiante ta sigui e pasonan tradicional di caba scol secundario y sigui nan estudio na Hulanda. Sin embargo, tin hopi studiante cu despues di caba scol secundario aki na Aruba, nan no ta sigur kico nan kier hasi of kico nan kier sigui studia. Algun studiante ta ta duda riba e decision cu por ta hopi costoso na final. Dr. Lasten ta splica cu Viamoon Career Technical High School ta un scol secundario cu ta enfoca riba e preparacion di e studiantenan pa e lugar di trabou.

Pa e ultimo añanan Dr. Lasten a ripara cu hopi studiante ta bai scol pasobra nan mester un diploma, pero nan no ta tuma e decision di e estudio cu nan kier hasi cu passion. “Aki mi kier hasie hopi mas didactico, interactivo, tin biaha tin lesnan cu ta sin muraya, pues pafo den naturalesa por ehempel” Dr. Lasten ta splica. Teaching from the heart, ta locual Dr. Lasten ta enfoca riba dje.

Ubicacion
Pa e ultimo añanan tin un problema grandi cu scarsedad di vivienda na Hulanda. Dr. Lasten ta splica, cu Chía, Cundinamarca, Colombia ta un ciudad un ora lew di Bogota Colombia, e ta den un area hopi tranquilo, y ta conoci pa su shopping malls. Segun Dr. Lasten, e calidad di bida na Colombia pa un studiante ta hopi mas halto cu na Europa y Merca actualmente. Un studiante por cubri su gastonan di huur un camber cu tur cos inclui pa $100 pa luna. Tin posibilidad pa biba off-campus unda studiantenan por opta pa comparti un cas y baha e gastonan mas ainda. Dr. Lasten ta invita studiantenan di Aruba, Bonaire y Curaçao pa sinti nan mes na cas na Chía Colombia. Unda cu e mes ta e rector, e ta un Arubiano biba un rato na Colombia, na cuidad hopi serca di cas, y bin caba bo Associate Degree den un tempo masha liher mes.

Apart di e scol, Colombia ta un pais grandi, tin hopi lugar pa conoce y diverti, tin malls, tin attraccionnan y tin hopi cos pa hasi. Si mester sinti heimwee mes, e pasashi ta barata y e distancia ta mas cortico. E scol mes tin un campus completo, incluiendo un misa. Colombia ta un pais cu cultura hopi religioso, pues e misa ta forma parti di hopi cuidad, scol, instancianan, edificionan di trabou etc.

Admision
E Arubiano News a puntra Dr. Lasten tocante admission di studiantenan di Aruba, Bonaire y Curaçao unda mayoria studiante ta sali for di e sistema di educacion Hulandes unda nos ta reparti esaki den diferente nivel, cuminsando cu Educacion Basico Profesional, Mavo, Havo, VWO y Universidad di Aruba. Dr. Lasten ta splica cu durante e proceso di admission, nan focus ta riba e parti humanistico. Cu e conocimento cu tur hende ta siña riba su mesun manera, cu diferente velocidad, tur studiante por logra ta mihor cu nan por ta. Dr. Lasten ta splica tambe cu no tin un discriminacion di e nivel di e studiante y ta kere cu tur studiante tin e mesun chance pa logra exito. Trahando na un forma hopi mas personalisa cu e studiante, ta sigura cu e studiantenan ta bin scol cu gana y animo.

Accreditacion
Dr. Lasten ta splica cu aunke e scol ta relativamente nobo, e la cuminsa su proceso di accreditacion na ambos Colombia y Merca. E accreditacion ta habri e porta pa studiantenan cu kier sigui studia na Universidad, por drenta e nivel di Universidad danki na e accreditacion cu e diploma di Viamoon tin.

Un cuidad di futuro
Dr. Lasten ta spera cu e cambionan di alcalde na Chia Colombia, cu e lo por conversa cu e alcalde, y hasi splica di e oportunidadnan pa Chia ta un cuidad di studiante. Cu esaki, e comercio tambe ta aporta na e crecemento di e studiantenan, hasiendo esaki un Public, Private, Community Partnership (PPCP). No solamente studiantenan ta haya sosten cu e partnership aki, pero e comercio y e comunidad tambe ta crese di e oportunidad aki.

Pa mas informacion tocante Viamoon Technical College por bishita www.viamoon.com pa mas informacion tacante admission por tuma contacto directamente cu Dr. Earney Lasten na contact@viamoon.com of na +54 318 719 9735