Pa conmemora e 200 Aña aki, e Kerki Protestant ta organisa un serie di actividad riba diasabranan y un diadomingo den luna di december 2022.
Diasabra dia 10 di december 2022 pa 7or di anochi cu e tema: 200 aña di Kerki Protestant di Aruba.
Haya sa kendenan ta e personanan den historia cu a duna e Kerki Protestant forma. Kico ta e storia di e Kerki di 1846? Pakico a con strui esaki y door di kende? Y con e Kerki actual a haya e localidad. Ken nan a haci esei, pakico y hopi mas.
Durante e anochi aki lo conta storianan di nos antepasadonan, cu a duna forma na e comunidad actual cu ta existi na Aruba. Un anochi cu hopi imagen visual y historia.
Oradornan pa e anochi aki ta:
Prof. Dr. Wim Rutgers, Neerlandicus
Drs. Leon Berenos, conocedor di tur cos
Drs. Peter Scholing, di Archivo Nacional
E evento ta tuma lugar na e Kerki na Oranjestad.
Diasabra dia 17 di december 2022 Presentacion di “Oranjestad Kerstsamenzang y concierto 2022”
Lo canta canticanan di temporada di Pasco cu otro, y lo repasa e textonan di mas importancia di Bijbel pa e temporada pa trece e ambiente di Pasco na un y tur. Tin presentación di varios músico cu lo canta hunto den un anochi yen di música, devoción, poesía y cancionnan di pasco. Despues di e concierto lo tin “kerst brood” y “Glühwein” den e hardin tur decora pa e ocasion.
Musiconan cu ta participa ta:
Pearl Peters, cu grupo di Cuarta,
Viola Heutger, riba viool
Ruth Bonevalle, riba viool
Bert Rodenburg, riba orgel
Na e Kerki na Oranjestad, diasabra dia 17 di december, pa 7 pm (kerki su portanan lo habri desde 6.30 pm).
Diasabra dia 24 di december 2022 ta presenta un misa di Noche Buena cu e tema ‘Luz den un mundo scur’
Bin scucha e milager di Pasco y Jesus, yiu di Dios, yiu di hende. E nacemento di Jesus a cambia e mundo aki. Reverendo Jan Rinzema, di Oranjestad lo tey y Bert Rodenburg cu su orgel y e coro di e projecto di Noche Buena 2022 dirigi pa Pearl Peters. Entrada ta gratis y por reserva cu Nancy Lemmers via Whatsapp 742 7236 of via e pagina di Facebook di Misa Protestant di Oranjestad. E kerki lo habri desde 8:15 pm y e evento lo cuminsa pa 9 pm.
Diadomingo dia 25 di december 2022 Mainta di Pasco cu henter famia pa 10:30 am.
Pasco mainta den misa, cu muchanan, canto pa henter famia. Loke ta central ta keda e muchanan cu nan projecto special ‘Het gaat goed komen!’ (Lo sali bon) acompaña pa Pearl Peters, riba piano.