E konvenshon di Dutch Caribbean Nature Alliance (DCNA) ku resientemente a tuma lugá a kòrda partisipantenan ku naturalesa ta un negoshi enorme. Sin embargo, hopi no ta konsiente di e diferente maneranan ku por hasi uzo di naturalesa pa krea kresementu ekonómiko duradero. Un di DCNA su metanan ta krea konsientisashon riba naturalesa su potensial.
Balor ekonómiko di naturalesa
Sra. Hellen van der Wal, presidente di direktiva di DCNA, ta splika ku “naturalesa ta provee nos ku alimento i ta ofresé nos alternativa pa entretenimentu i relahashon. E biodiversidat úniko ku nos tin den Karibe Ulandes ta un fuente di atrakshon pa turista ku ta biaha pa nos region netamente pa kontemplá e naturalesa aki.” Naturalesa ta forma e fundeshi pa tur aktividat ekonómiko i di akuerdo ku World Wide Fund for Nature ta kalkulá ku naturalesa su kontribushon na e produkto interno bruto na nivel mundial tabata 125 bion dòler na aña 2018.
Preokupashon tokante durabilidat
Miéntras ku naturalesa ta ofresé oportunidat pa kresementu ekonómiko konsiderabel, DCNA ta kere ku un kresementu asina no por bai a kosto di e patrimonio natural di e islanan di Karibe Ulandes. Pa por protehá nan biodiversidat úniko, e islanan mester integrá práktikanan di desaroyo duradero den maneho i plannan di término largu. Pa por logra esaki, naturalesa mester ta punto di salida den toma di desishon i den trahamentu di plannan stratégiko.
Aporte di DCNA
Durante e konvenshon ku resientemente a tuma lugá na Kòrsou direktiva di DCNA a renobá su kompromiso pa intensivá esfuersonan pa krea mas konsientisashon tokante naturalesa su balor ekonómiko, partikularmente bou di e gobièrnunan di Karibe Ulandes. Tambe DCNA lo sigui enbolbí e siguiente generashon den diskushonnan tokante konservashon di naturalesa. Ta probá ku nan aporte ta di gran balor i p’esei tin un programa struktural pa hóben.
Tambe DCNA lo sigui stimulá i fasilitá investigashon sientífiko, loke ta nesesario pa nabegá un futuro kargá ku reto i diferente krísis, debí na kambio klimatológiko. Pa alkansá e metanan importante aki, DCNA lo sigui krea lasonan di kolaborashon i rekoudá fondo. Esaki ta krusial, konsiderando e retonan ku a surgi komo konsekuensia di e pandemia.
Ainda tin hopi trabou pa hasi i p’esei kolaborashon entre e seis islanan di Reino den Karibe ta di vital importansia. Sra. Van der Wal ta kere ku e konvenshon a logra fortifiká relashonnan eksistente, pero tin hopi reto pa enfrentá ainda. “Ku kambionan importante den nos struktura di maneho, nos ta ekipando nos mes pa por sirbi nos parkenan mihó den nan trabou di konsientisashon i konservashon di naturalesa. Ademas, nos ke informá e respektivo gobièrnunan di forma mas efektivo, p’esei nos lo sigui traha pa fortifiká nos relashon i kolaborashon ku tur gobièrnu den Karibe Ulandes.” E ta terminá enfatisando ku “no por papia di desaroyo duradero, sin papia di konservashon di naturalesa.”
