Dutch Caribbean Nature Alliance resientemente a saka nan Manual pa Suavisá Riesgo di Desaster pa Maneho di Organisashon di Parkenan usa pa redusí e impaktonan di desasternan ku ta relashoná ku wer por tin riba áreanan di naturalesa protehá. E manual, ku e kompanianan kontratá Nature2 i Parks Work a desaroyá, ta resultado di e eksperensia ku e Maneho di Organisashon di Parkenan na Saba, Statia i St. Maarten a akumulá durante e temporada desastroso di orkan 2017.
A produsí e Manual pa Reakshon riba Desaster Natural pa e islanan di Hulanda Karibense Saba, Statia i St. Maarten despues ku e islanan akí a konfrontá impaktonan pisá, kousá pa e orkannan Irma i Maria na 2017. E manual ta prinsipalmente basá riba e eksperensianan di e Manehonan di e Organisashonnan Sint Maarten Nature Foundation, Saba Conservation Foundation i STENAPA St. Eustatius, tin komo meta duna hèrmèntnan nesesario pa por reakshoná efektivamente riba desasternan natural den sentido di preparashon, reakshon i restorashon. Fondo pa e Manual ta forma parti di e sosten finansiero di emergensia ku e DCNA Trust Fund a duna Nature Foundation, SCF i STENAPA komo reakshon riba e temporada di orkan di 2017.
E Manual ta ofresé guia kon pa anda efektivamente ku orkan i eventonan di wer severo for di perspektiva di maneho di un rekurso natural. E nesesidat di un protokòl pa kasonan di desaster similar, manera fluho di sargassum ku ta yega kosta i pandemia ku e managernan a indiká, a krea espasio pa inkluí e tipo di protokòlnan akí. E Manual ta funshoná manera un hèrmènt pa asistí managernan i personal di e parkenan ku maneho di desaster, maneho di preparashon, maneho di reakshon i maneho di restorashon. E kontenido ta inkluí detayenan riba planifikashon i preparashon pa kasonan di un evento di wer severo, evaluando e impakto riba rekursonan natural i kon pa anda ku reakshon, drechamentu i restorashon.
“E manual akí lo hisa grandemente e kapasidat di reakshon di Nature Foundation, Saba Conservation Foundation i STENAPA St. Eustatius pa por reakshoná riba desasternan natural. Te hasta ku mi propio eksperensia personal promé, durante i despues ku e pasada di e orkannan Irma i Maria i mirando e manera ku Nature Foundation a reakshoná, mi por bisa ku esaki ta un hèrmènt importante pa sigurá un reakshon adekuá, seif i strukturá. Anto tambe ora konsiderá e sentido di duna e sosten finansiero i e sosten di kapasidat nesesario na e organisashonnan na momentu ku di parti di gobièrnu no tin un struktura pa esaki den e temporada despues di un orkan grandi,” e eks Manager di Sint Maarten Nature Foundation i e aktual Direktor di Dutch Caribbean Nature Alliance Tadzio Bervoets ta komentá.
