Dutch Caribbean Nature Alliance ta preparando organisacionnan pa conservacion di naturalesa den Caribe Hulandes pa shock externo

Dutch Caribbean Nature Alliance (DCNA) su di dos reunion di directiva pa 2021 a tuma luga durante nan convencion recien na Corsou. Su Excelencianan, gobernador Holiday di St. Maarten, gobernador Boekhoudt di Aruba y sr. Jaime Saleh, patrono di DCNA, tabata presente como observador di discusionnan crusial tocante maneho y DCNA su vision strategico pa futuro.

Vision strategico

Despues di diescinco aña di existencia, DCNA ta dispone di e instrumentonan necesario pa yuda hasi su organisacionnan miembro resisti retonan na caminda. E sosten inmediato, debi na COVID-19, na e parkenan ta keda esencial, pero DCNA mester enfoca tambe riba cambio climatologico, un menasa contra humanidad su existencia y contra bida y medionan pa sobrevivi di e comunidadnan den Caribe Hulandes. Director di DCNA, Tadzio Bervoets, a indica cu “ta crucial pa halsa e nivel di resistencia di nos organisacionnan pa maneho di areanan protege, pa nan por resisti varios shock externo na caminda, como consecuencia di e crisis climatologico cu nos ta bibando. Un otro meta strategico di DCNA ta pa conseha nos gobiernrnan local di forma mas efectivo, teniendo na cuenta cu nan ta un grupo di interes importante.”

Bon maneho

Pa por sirbi e organisacionnan miembro miho, DCNA ta bai cuminsa opera den un structura di maneho cu conoce dos nivel. Esaki lo permiti maneho diario di e organisacion atende tareanan cu ta rutina, mientras cu directiva por encarga cu toma di decision pa largo plaso y planiacion strategico. Durante e reunion di directiva a trata tur e aspectonan regular di bon maneho, manera aprobacion di presupuesto pa aña 2022 y aprobacion di e relato financiero pa aña 2021. Mas aleu e reunion a brinda oportunidad na secretariado di DCNA y e organisacionnan miembro pa amplia riba actividadnan cu a tuma luga despues di e ultimo reunion di directiva cu a tuma luga na april.

Na caminda pa 2030

Directiva a yega na un acuerdo pa loke ta trata e plan strategico pa e periodo 2021-2030. E plan aki ta considera tantu e retonan comun di e organisacionnann pa conservacion di naturalesa, como e nesesidadnan specifico di cada isla. Crea conscientisacion tocante e desaroyonan aki ta un aspecto importante di DCNA su metanan. “Nos ta den e fase final pa contrata un colaborado di informacion y relacion publico pa mehora nos propio capasidad pa comunica y pa yuda e parkenan mehora esun di nan pa comunica cu nan respectivo comunidadnan tambe”, Bervoets a indica.