Dutch Caribbean Nature Alliance (DCNA) orguyosamente ta anuncia un logro importante den desaroyo di su organisacion– implementacion di un sistema dualistico di maneho. Dia 4 di december 2023 directiva di DCNA, representa pa presidente Hellen van der Wal y secretario Kai Wulf a firma e Statutonan nobo cerca notario na Sint Maarten. E paso strategico aki ta refleha DCNA su dedicacion na promocion di bon maneho, cual segun expectativa lo tin un impacto grandi riba efectividad di e organisacion, manera iniciativa di recaudacion di fondo y esfuerso riba tereno di conservacion di naturalesa den region di Caribe Hulandes.
DCNA ta basa riba e principionan di colaboracion y maneho di bienes uniendo e islanan di Caribe Hulandes den un red regional fuerte. Como un organisacion dinamico y creciente, DCNA a involvi su mes den su reaccion riba e retonan y oportunidadnan cu conservacion y maneho di naturalesa ta trece cu ne den area di Caribe Hulandes. Inicialmente DCNA tabata opera bou di un sistema di maneho cu un solo nivel di maneho y a reconoce cu a bira tempo pa pasa pa un asercamento di maneho mas avansa y integral. Segun añanan tabata pasa DCNA a considera e “best practices” y e lesnan siña for di modelonan exitoso di organisacionnan internacional di proteccion di naturalesa, pa transforma e structura actual di maneho den un sistema di maneho cu dos nivel.
E desicion pa cambia pa un sistema di maneho dualistico pa DCNA tin su rais den su dedicacion na transparencia, responsabilisacion y un traspaso pa un proceso di tuma desicion sin ningun problema. E organisacion lo sigui cumpli cu e normanan mas halto di maneho cu awendia ta un exigencia. E sistema dualistico di maneho ta introduci un distincion evidente entre Hunta di Directiva, cu ta responsabel pa maneho diario, presupuesto y planificacion strategico y Hunta di Comisario, cu ta encarga cu supervicion, maneho y e tarea pa salvaguardia interes riba termino largo di e organisacion. E separacion di responsabilidadnan aki no solamente ta di acuerdo cu “best practices” internacional, pero tambe ta haci posibel pa DCNA nabega den un forma mas efectivo atraves di e complehidad di e paisahe di conservacion di naturalesa. Pa DCNA e paso dedica aki ta nifica un paso grandi padilanti den fortificacion di su fundeshi. Banda di esaki lo instala un Hunta di Conseho. Den e organo aki tin un representante di cada organisacion insular. E presidente automaticamente ta miembro di Hunta di Comisario. Den e reunion mensual di Hunta di Conseho, programanan y proyectonan di proteccion di naturalesa, formulacion di maneho y representacion conhunto ta bini dilanti. Hunta di Conseho lo traha estrechamente hunto cu Hunta di Directiva. Di e manera aki ta surgi un campo nivela mas constructivo cu enfoke riba esencia di DCNA, esta proteccion di naturalesa den Caribe Hulandes.
Arno Verhoeven, director statutario nobo di DCNA a declara: “Nos ta hopi contento cu despues di hopi aña di preparacion, porfin nos tin un sistema dualistico. Esaki ta loke stakeholdernan ta spera awendia di organisacionnan di proteccion di naturalesa. Nos ta mira cu otro organisacionnan na e islanan tambe a scoge pa e transicion aki. Na aña 2019 ya caba FPNA na Aruba a cambia pa un sistema dualistico, e siman aki Nature Foundation na Sint Maarten a dicidi pa haci e cambio, SCF na Saba ta den preparacion y recientemente CARMABI na Corsou a cuminsa traha riba un modelo di maneho nobo. DCNA lo yuda nan cu e cambionan aki.” Segun Arno Verhoeven no ta trata solamente di responsabilisacion y responsabilidad. Verhoeven: “E structura nobo lo haci nos mas efectivo y mas decidido, y mi ta convenvi cu banda di un miho colaboracion dentro di e aliansa, esaki lo haci nos red pafo di nos propio region tambe mas fuerte.”
Finalmente DCNA kier expresa su gratitud na su sostenedonan actual y ta invita su partnernan y comunidad pa join su mision pa conserva y proteha naturalesa di area Caribense.
