Dutch Caribbean Heritage Platform (DCHP) a keda lanta na aña 2014 pa diferente fundacion di e islanan den Reino cu e meta pa cooperacion den preservacion di herencia cultural.
Cada organisacion cu ta parti di e plataforma tin su mesun rol, tarea y responsabilidadnan. Ta logra e meta principal pa medio di intercambio di conocemento, experticio y informacion y pa medio di crea conscientisacion di e balor di herencia cultural bou di e habitante, bishitante y gobernantenan di cada isla. Banda di esaki, creando un network amplio di paisnan den region y internacional. Pa Aruba tin dos fundacion cu ta forma parti di e Plataforma cu ta Stichting Rancho y Stichting Monumentenfonds Aruba.
E iniciativa pa oficialisa e Plataforma na 2014 a bin for di Stichting Monumentenfonds Aruba cu tambe a lidera e plataforma e prome dos aña segun e acuerdo cu cada dos aña un otro isla lo tuma e presidencia di e plataforma. Un di e prome proyectonan cu a keda organisa tabata e Erfgoed Academie na Aruba cu expertonan for di region na 2015.
Stichting Monumentenfonds na 2019 a haci un peticion den nomber di DCHP pa subsidio pa actividadnan di e plataforma na ’Rijksdienst voor het Cultureel Erfgoed’. Siman pasa a ricibi e bon noticia cu a acorda e peticion pa un subsidio di te na un maximo di 125 mil euro pa un periodo di tres aña. Cu esaki e plataforma lo por continua organisando actividadnan cu e meta pa intercambia experticio y conocemento manera ya a cuminsa cune na 2015.
Ya e fundacionnan di e diferente islanan cu ta forma parti di e plataforma ta planeando e siguiente actividad na un di e otro islanan pa e interesadonan den region. Esaki lo tuma lugar na 2022.
Pa mas informacion tocante actividadnan di e Plataforma den futuro por sigui e pagina di Facebook di Dutch Caribbean Heritage Platform.