Partido Movimiento Electoral di Pueblo (MEP) a introduci e ekipo di candidato cu vision, determinacion y curason pa logra cosnan grandi pa Aruba. Na e occasion a duna bon bini na candidatonan na e famia prestigioso y riba e lista victorioso di MEP. Un evento un poco diferente cu loke Partido MEP ta haci normalmente ora di presenta su candidatonan prome cu eleccion. E biaha aki, teniendo cuenta cu tur regla vigente di DVG, esaki a bay virtual, hunto cu candidatonan y nan famia y directiva di MEP.
Den su discurso, Lider di MEP, Sra. Evelyn Wever – Croes a enfatisa riba e realidad di bida di un candidato politico cu ta encera hopi sacrificio pa por tin un carera politico. E sacrificio tambe ta bin di parti famianan, pasobra tin menos tempo pa famia y mester atende cu preocupacionnan di otro famia den comunidad. Sin lubida cu e bida di un politico ta totalmente publico. Lamentablemente, famianan tambe ta wordo ataca y lastra inhustamente, hopi biaha djis pasobra ta famia. Prome Minister a gradici cada un miembro di famia di candidatonan, esposo, esposa, pareha, yiu, mayornan, rumannan, nietonan entre otro.
“Danki pa duna nos candidato e espacio pa por traha pa hiba nos pais padilanti. Un danki especial na mi casa Kenneth, y mi yiunan, Christine, Kevin, Claudine, no solamente pa boso sosten y amor di semper, pero pa boso sacrificionan tambe”, Lider di MEP a expresa.
Ya ta casi 4 aña pasa cu Partido MEP a pidi pueblo e confiansa den forma di un voto, y a haya e confiansa pa forma un coalicion. P’esey cu gran honor y privilegio Gabinete Wever-Croes a dirigi e pais. E no tabata facil, pero a goberna na e miho forma posibel. A demostra cu por goberna den bon tempo y den tempo dificil. A demostra cu especialmente den tempo di crisis, Partido MEP ta responde y keda leal cu e pueblo su voto, y leal na e respet pa e confiansa cu cada un votador a duna.
“No a core pa responsabilidad, sino a accepta cada reto cu nos a topa cu ne cu balentia y amor pa pais”.
Na Maart 2020 Gabinete Wever – Croes 1, a haya e reto di mas grandi cu nos isla a conoce, e pandemia di COVID -19. Aki tambe Gobierno a responde cu determinacion pa salba bida y proteha nos comunidad, a tuma e desicionnan duro, strategico y trempan, despues a sigui monitor e situacion diariamante. A coordina cu tur instantancia di cuido den un operativo di cuido y maneho di crisis na Aruba. Den henter Reino Aruba a haya elogio pa e maneho cu a hiba. Gobierno a haya hopi critica y resistencia durante e crisis, sinembargo mester a haci loke mester a wordo haci, pa proteha nos grandinan y esnan mas vulnerabel y esnan den hospital.
“Awor cu e eleccion aki, ta pidi pueblo e confiansa pa sigui cu e trabounan di recuperacion pa logra pone Aruba bek riba e caminda cu ya tabata logrando, un Pais cu orden y stabilidad financiero, cu tin confiansa y respet den Reino.
Nos ta bolbe compromete nos cu esaki pa un futuro briyante y feliz pa henter nos comunidad, y cu e confiansa masal dia 25 di juni nos ta bay logr’e!
Cu bo nos ta avansa, Hunto, Cu bo, nos por enfrenta retonan, saca Aruba di pandemia, pone Aruba para bek riba propio forsa y saca Aruba padilanti”, Lider di MEP y Prome Minister Evelyn Wever-Croes a termina bisando.
