‘Di kiko asina trabou di un frakshon den Konseho Insular ta konsistí?’ Esaki ta un pregunta ku ta biba serka hopi di nos suidadanonan. Mayoria hende tin e impreshon ku e úniko kos ku miembronan di Konseho Insular ta hasi ta akudí na reunion. Esaki no ta nada straño pasobra ta esaki tur hende ta haña tende i mira na radio, televishon i medionan sosial. Frakshon Coffie a emití un relato ámplio di e trabounan ku e frakshon a hasi durante su promé 3 lunanan di eksistensia, esta òktober, novèmber i desèmber 2020. Frakshon Coffie, den e kaso aki su úniko miembro Daisy Coffie, ku sierto ayudo eksterno a okupá su mes ku trabou atministrativo, preparashon pa reunion, prepará disertashon, orientá riba asuntunan den komunidat, konsulta ku suidadanonan, korespondensia, solisitá dokumentu, partisipá na e diferente tipo di reunion, hasi bishita di trabou, traha komunikado pa prensa i mantené un bon relashon ku prensa.
Trabou atministrativo
Trabou atministrativo ta algu ku tin ku tuma lugá diariamente. Tur dia tin dokumentu pa archivá, tantu komo ‘hard copy’, komo digitalmente. Mester paga bon tinu riba konvokashonnan ku ta drenta pa reunion i nota esakinan den agènda di frakshon. Mesora mester prepará e dokumentunan pa kada reunion ku a keda konvoká sino ta surgi retraso indeseá. Naturalmente diariamente hopi biaha pa dia mester atendé telefon i vigilá agènda pa no lubidá riba ningun tópiko òf tarea.
Preparashon pa reunion
Un parti hopi intensivo di e trabou ta e preparashonnan ku tin ku tuma lugá promé ku kada reunion. Durante e tres lunanan menshoná e parti aki pa konsehal Daisy Coffie a konsistí di diariamente studia dokumentunan ku ta drenta i prepará pregunta pa reunion. Ta trata aki di tantu preguntanan ku e ta hasi aktivamente durante reunion komo preguntanan ku adelantá e ta manda por eskrito. Vários di e preguntanan aki a surgi despues di a studia asuntunan ku ta biba den komunidat i e konsehal di Frakshon Coffie a haña nesesario pa duna atenshon na esakinan. Den e periodo aki Daisy Coffie a dediká sigur 4 siman na preparashon di tratamentu di Presupuesto 2021 i 1 siman na preparashon di e di dos kambio di presupuesto. Na 15 okashon sra Coffie a prepará disertashon i a trese esakinan dilanti durante reunionnan di Konseho Insular. E disertashonnan aki tabatin un variedat di tópiko, manera: e desishon pa bira independiente, e di dos kambio di presupuesto, medidanan di emergensia, programa di gobernashon, ‘Uitzendbureau’, gratifikashon pa personal den kuido, investigashon di integridat, mal maneho finansiero, presupuesto 2021, SOAB (Stichting OverheidsAccountant Bureau – Fundashon Ofisina Akòuntent di Gobièrnu Hulandes) i benta di tereno. Na dos okashon Daisy Coffie a papia tokante e akuerdo intergubernamental i e impuesto di awa shushi.
Karta ku pregunta
Durante e 3 lunanan aki konsehal Daisy Coffie tabatin hopi atenshon pa asuntunan ku ta biba den nos komunidat i na no ménos ku 14 okashon a manda karta ku pregunta por eskrito tokante un kantidat di tópiko, manera: ordenansa di emergensia, STINAPA, BOPEC, Uitzendbureau, Gratifikashon pa Personal den Kuido, Rapòrt Investigashon di Integridat, Stipulashon di Presupuesto 2021, posishon i pregunta adishonal investigashon di integridat, solisitut Direktorado Planifikashon i Desaroyo, kuementu di piedra pa mula, siklo di presupuesto, reakshon riba konseho di gezaghèber relashoná ku rapòrt BING, státùs di BOPEC i benta di tereno.
Trabou variá ku ta duna satisfakshon
E tres lunanan aki a laga mira ku ta trata di un trabou ku hopi variashon, pero ku ta duna hopi satisfakshon tambe. Na kuater okashon konsehal Daisy Coffie por a duna ayudo na personanan ku tabatin mester di e sosten aki. Tambe a bai un karta pa Tweede Kamer hulandes tokante e tratamentu parlamentario di e proposishon di lei ‘Lei Medidanan Covid-19’ i un karta pa Kolegio di Supervishon Finansiero (Cft) tokante stipulashon di Presupuesto 2021. Karta a bai tambe pa
sr V. Kalvenhoven tokante transporte pa hende ku limitashon, pa BIT-Lab tokante partisipashon di hóbennan i pa St. Eustatius na okashon di ‘Statia Day Celebration’. Durante e periodo aki Frakshon Coffie a manda 4 solisitut pa dokumentu. Ta trata aki di dokumentunan tokante e Proyekto di 500 Kas di FCB, Grupo di Direkshon Suministro di Kombustibel Boneiru, Desaroyo di Proseso di Presupuesto 2021 i vakaturanan i solisitut na Direktorado di Planifikashon i Desaroyo. Naturalmente tin e parti tambe ku ta mas visíbel pa tur hende, esta atendementu di reunion di Konseho Insular. Den e tres lunanan aki Daisy Coffie a partisipá na 4 reunion di Presidio, 6 reunion di Komishon Fiho, 8 reunion di Forma Opinion, 5 reunion di Tuma Desishon i 12 reunion sosial ku gruponan informal. Bishitanan di trabou konsehal Coffie a hasi na e proyektonan di bibienda di Fundashon Cas Boneriano na Hato i na Nieuw Amsterdam. E kontakto ku prensa a bai hopi ameno. Frakshon Coffie a prepará 11 komunikado pa prensa di kua 9 ku tradukshon na hulandes òf papiamentu i konsehal Coffie a duna 5 entrevista na medionan di prensa. Durante e periodo di tres luna aki di parti di Frakshon Coffie a pone èkstra atenshon riba media sosial entre otro Facebook. Nos komunidat ta hopi aktivo riba Facebook i nos a sòru pa ta presente riba e plataforma aki i informá debidamente tokante nos pensamentunan, kartanan mandá i preokupashonnan. Total tabatin no ménos ku 48 publikashon riba medionan sosial, kual ta mas o ménos 3 pa 4 publikashon pa siman.
