Den transcurso di ultimo añanan A.T.A. a bin ta pone atencion na ‘vacation rentals’ como un sector importante den nos industria turistico. A pone atencion na calidad di e servicio como tambe na pago di impuestonan.
Ta estima cu tin aproximadamente 20 miyon florin riba caya di esnan cu no ta cumpli cu nan pago di e ‘tourism levy’. A.T.A. a bin ta den dialogo cu entre otro Departamento di Impuesto ya pa algun aña pa wak con lo por asisti pa colecta e fondonan aki. Esaki ta keda un punto sumamente importante.
Na 2017, A.T.A. a crea un programa enfocando riba calidad di e acomodacionan considera alternativo. Como parti di esaki, un taskforce consistiendo di diferente departamentonan concerni a bishita 100 acomodacion na Aruba pa controla si nan tawata limpi, sigur, di bon calidad y entre otro den cumplimento cu nan impuestonan.
Por bisa cu por lo general, ta wak cu riba diferente plataformanan cu e ‘reviews’ pa e tipo di acomodacion aki ta bon, cu comentarionan menos bon aki aya!
Na 2019, A.T.A. a comisiona MGM Source pa conduci un estudio di ‘vacation rentals’ na Aruba. 354 propiedad consistiendo di 2,508 unidad a wordo cubri den e estudio aki.
E aña aki, A.T.A. a cuminsa traha cu e plataforma ‘Transparent’. ‘Transparent’, ta cubri un total di 5,632 propiedad consistiendo di 6,601 camber y e capacidad pa carga 16,461 bishitante. Mirando e informacion ricibi for di ‘Transparent’ por wak cu desde 2019 pa awo e prijs averahe, e ocupacion averahe y e ingresonan di ‘vacation rentals’ a subi y Aruba su cifranan di ocupacion y prijs ta mas halto den comparacion cu cu otro paisnan den region.
E cifranan di yegada di A.T.A. a indica cu 22% di bishitantenan a keda den tipo di acomodacion aki durante 2021. Tin algun mercado manera Hulanda por ehempel cu tin preferencia pa e tipo di acomodacion aki. Basa riba e interes di e mercado den e tipo di acomodacion aki ta haci promocion di ‘vacation rentals’ den mercadonan relevante. E segmento aki di acomodacion ta uno cu ta creciendo y ta merece su debido atencion.
A.T.A. ta contento cu e incepcion di Vacation Rental Professionals Aruba y ta aplaudi nan iniciativa pa conduci un estudio di e impacto economico di e segmento aki, y ta contento di por a contribui na haci e estudio aki un realidad.
