ORANJESTAD, Aruba
Durante e cumbre virtual siman pasa cu hobennan profesional, Premier Evelyn Wever-Croes a splica cu ta importante pa envolve hobennan den e proceso di negosacion cu Hulanda, pasobra nan ta esnan cu ta bay tuma decisionnan den futuro.
Di parti di Departamento di Asuntonan Huridico, sr. Carlos Guaimo a splica kico e “entidad” ta cu Hulanda a propone. E meta di e entidad ta pa asisti den implementa reformanan riba nivel gubernamental, logra finansa publico sostenibel y duradero, haci economia di Aruba mas resiliente. Su tareanan ta bay bira entre otro asisti y supervisa desaroyo y ehecucion di proyectonan y medidanan, inicia y ehecuta proyectonan, duna subsidio na individuo y companianan, tene shares den compania (incluyendo compania estatal), y si haya necesario, pone Aruba bou supervision financiero mas estricto (verscherpt financieel toezicht).
Locual ta riba mesa awor ta pa e entidad aki hunto cu Gobierno di Aruba defini cual ta e prioridadnan cu mester wordo ehecuta pa haci e economia di Aruba mas fuerte y cu por resisti otro shocknan den futuro.
Den e prome concepto tabata poni cu e entidad por tuma diferente decision riba su mes, sin input di Gobierno di Aruba, pero awor a keda palabra cu e entidad lo haci esaki den consulta cu Gobierno di Aruba y ta duna Gobierno di Aruba espacio pa duna punto di bista. Esaki ta conta tambe por ehempel pa loke ta trata e constelacion di e entidad, a bin acerca cu Hulanda lo consulta cu Prome Minister di Aruba pa loke ta trata e profielschets y pa e nombracionnan mes.
Tambe a keda palabra cu, ora ta posibel e entidad lo bay den consulta cu Gobierno di Aruba, prome cu e entidad inicia y maneha proyectonan, y pa cu su participacion den companianan estatal.
Cambionan den e nota di splicacion (memorie van toelichting)
Gobierno di Aruba a propone varios cambio den e ley relaciona cu principionan democratico pa e pueblo di Aruba, Parlamento y Gobierno y relaciona cu nos constitucion. Hulanda a bay di acuerdo pa inclui esakinan den e ‘toelichting’, splicacion di e ley. Por ehempel, a añadi cu entidad lo respeta e posicion constitucional di Aruba y su institutonan, e entidad lo solamente entama reformanan, proyectonan y medidanan cu Aruba mes a bay di acuerdo cu n’e ‘op hoofdlijnen’, e entidad no lo mete den asuntonan autonomo di pais Aruba tanten cu Aruba mes no a duna aprobacion democratico pa nan haci tal.
“Nos lo a prefera di wak e cambionan den e ley mes, considerando cu si tin discrepancianan entre un ley y su toelichting, e ley ta esun cu ta carga mas peso, pero Hulanda no a bay di acuerdo ainda. Den e dianan nos dilanti nos lo sigui negocia y purba yega na e miho alternativa pa cada ciudadano di pais Aruba”, Premier Evelyn Wever-Croes a duna di conoce.
