“Campaña nobo di Ban Serio! un iniciativa di Aruba Tourism Authority (A.T.A)
Como un paso firme pa cu sostenibilidad, Ban Serio! como iniciativa di A.T.A., ta lansa campaña ‘Scoge pa bleki, e ritmo di recicla’. Un campaña di conscientisacion caminda cu ta promove e beneficionan ambiental ora di scoge pa bleki enbes di glas of plastic durante 2024.
E meta di e campaña ta pa pone enfasis pa scoge pa bleki ya cu esaki ta 70% mas reciclabel compara cu e glas of e plastic. Creando y reenforsando e bon habitonan di e comunidad y pa hunto nos tene Aruba Limpi.
Cu inicio den Carnaval 70, e campaña lo conta cu presencia durante di Parada Grandi di Oranjestad y durante evento di Casio y Soca Monarch. Por bishita e booth di Ban Serio! pa informacion, saca potret, deposita bo bleki, y pa ricibi diferente articulo promocional.
Ta di menciona cu e campaña lo continua den 2024 durante di temporada di Pasco Grandi y campamento, como tambe durante eventonan nacional manera Dia di Himno y Bandera, Dia di Rey, y mas. E campaña aki sigur lo ta aplicabel na actividadnan local cu Oficina di Turismo, A.T.A. ta patrocina durante aña.
Pronto lo anuncia un lugar deposito caminda cu e comunidad local por deposita nan bleki durante aña. Lo keda actualisa e cifra cu e proposito pa keda conscientisa e comunidad local y bishitante di e isla riba e tema di recicla na Aruba.
Na final lo crea algo masha spectacular cu e blekinan colecta pa asina finalisa e campaña den un forma grandi.
Tocante Ban Serio!
Ban Serio! ta un iniciativa di Aruba Tourism Authority cu tin como meta pa crea mas consientisacion pa pone mas enfasis riba e siguiente pilarnan; Medio Ambiente, Hospitalidad, Cultura y Siguridad. Pa medio di diferente iniciativa y programa, Ban Serio! ta pone atencion special riba e puntonan aki cu tin impacto riba e bida di nos hendenan local y tambe riba Aruba como producto turístico.
