Den april Dienst Uitvoering Onderwijs (DUO) ta bishita Boneiro, Sint Maarten, Sint Eustatius y Saba. DUO ta habri un oficina di servicio temporal riba e islanan aki pa papia cu futuro y ex-studiantenan. Ademas DUO ta organisa encuentronan di informacion tambe y ta ofrece asistencia personalisa pa problemanan di pago na e sitionan. E bishita ta un continuacion di e bishita na Aruba y Corsou aña pasa. Pa futuro studiantenan riba e islanan aki DUO ta organisa un webinar awor.
Encuentronan di informacion
E encuentronan di informacion ta enfoca riba studiantenan cu ta bay studia na Hulanda y nan mayornan. Durante e encuentronan nan ta tende tur cos tocante financiamento di estudio y otro asuntonan cu nan mester regla na Hulanda. Na Sint Maarten ta tuma luga tambe un encuentro di informacion pa ex-studiantenan. Durante di esaki ta duna entre otro informacion tocante e posibilidadnan pa pidi un midimento di capacidad financiero, pagamento bek lokalmente y kico mester haci ora tin problema cu pago.
Oficina di servicio temporal
Personanan por pasa na e oficinanan di servicio temporal cu tur nan preguntanan tocante financiamento di estudio Hulandes y pago bek di nan debe di estudio. Pa bishita un oficina di servicio no tin mester di traha un afspraak. Ex-studiantenan mester bin cu un prueba di identidad si. Y si nan kier pidi reduccion di e montante mensual, nan mester trese tambe un resumen di nan entrada. Di e manera ey DUO por yuda e grupo di enfoce mesora si esey ta posibel.
Ayudo personalisa
DUO gustosamente kier yuda preveni cu ex-studiantenan ta haña nan den problemanan financiero. P’esey ex-studiantenan cu un atraso den pago cerca DUO ta haña un ultimo oportunidad pa evita cu ta pone esaki den man di un oficina di incasso. Un parti di nan ta haña un invitacion di DUO pa bin papia cu un colaborado pa yega na un solucion na midi.
Informacion online na Aruba y Corsou
Pa futuro studiantenan na Aruba y Corsou DUO ta organisa un webinar. Esaki ta un continuacion di e encuentronan di informacion cu a tene na november. Si tin pregunta (ex-)studiantenan di Aruba y Corsou por tuma contacto via chat y videocall cu DUO.
Mas informacion
DUO ta di 11-21 di april na Boneiro, di 11-21 di april na Sint Maarten, 25 y 26 di april na Sint Eustatius y riba 28 y 29 di april na Saba. Mas informacion tocante e sitionan y orarionan di apertura di e oficinanan di servicio y orarionan di e encuentronan di informacion por haña riba duo.nl/bezoekantillen.
