Duda no ta bini di Dios, duda ta un mal influencia, cu ta pone hende kere cu e no por logra, y cu tur cos a caba pe, y asina limita su expectativa di avansa den bida, causando preocupacion y stress. Pero fe den Dios ta tur locual nos tur tin mester pa nos avansa den bida, pasobra sin fe ta imposibel agrada Dios.
Ora nos tin fe nos ta demostra confiansa, y cu nos ta reconoce cu Dios ta na nos banda, y cu nos por conta cu Dios su yudansa, y esey ta locual ta move man di Dios, ora nos kere cu Dios por y ta haci, sin mira e cos ainda, den esey nos ta demostra na Dios, cu nos ta depende completamente riba Dios. Mira e man di Señor no ta cortico cu e no por salba,tampoco su orea no ta sordo cu e no por tende.(Isaias 59:1).
Ningun hende no por stroba Dios di bendiciona bo, pero ora nos no ta kere nada no ta sosode. Pasobra tur cos ta posibel pa esun cu ta kere.Y manera nos tur sa cu pa Dios nada ta imposibel. Pasobra Mi pensamentonan, no ta boso pensamentonan, ni boso camindanan no ta Mi camindanan, Señor ta declara: Pasobra mescos cu e cielonan ta mas halto cu tera, asina mi camindanan ta mas halto cu boso camindanan, y Mi pensamentonan ta mas halto cu bo pensamentonan. ( Isaias 55:8-9).
Pasobra manera awacero y sneeuw ta cay for di cielo, y no ta bolbe ayanan, sin muha tera, y ta haci tera produci y spreit , y ta duna simia na e sembrado y pan na esun cu ta come. Y asina Mi palabra cu ta sali for di Mi boca lo ta: e lo no bolbe bashi serca Mi, sin cumpli cu loke mi ta desea y sin alcansa e proposito cu cual mi a mande.( Isaias 55:10-11).
Locual Dios papia, ningun hende no por cambia, locual Dios manda pa bo ningun hende no por cambia di direccion.
Ciencia, technologia, bruheria, y tur otro pensamento di hende, no por compara cu e grandesa di Dios. Mira Ami ta Señor e Dios di tur carni, acaso tin algo cu ta mucho dificil pa mi. ( Jeremias 32:27). Akinan nos por realisa cuanto tardansa nos duda,murmuracion, y falta di fe por causa den nos bida. Den Numbernan 11:21-22 Moises no tabata kere cu Señor por duna 600.000 hende di come carni y Moises a bisa cu no tin suficiente cria di bestia chiki, ni cria di baca, of mester recohe tur pisca den laman y Señor a bisa Moises :Señor su poder ta limita? Awor lo bo mira si mi palabra lo wordo cumpli na bo ,si of no.
E grandesa di Señor semper lo supera pensamento di hende pasobra nos Señor ta soberano.
Ami ta Dios y no tin ningun manera Mi. Kende ta declara e fin for di principio,y for di temponan antiguo cosnan cu no a wordo haci ainda, bisando: Mi proposito lo wordo estableci, y lo Mi cumpli cu tur loke ta agrada Mi.( Isaias 46:9-10).
E ta cura esnan di curason kibra, y ta mara nan heridanan,E ta determina e cantidad di streanan, E ta yama nan tur na nan nomber. Grandi ta nos Señor , y abundante den fortalesa, Su comprendemento ta infinito.( Salmo 147:3-4-5).
Un biaha mas Dios a papia,dos biaha mi a tende esaki, poder ta pertenese na Dios.( Salmo 62:11). Hesus a bisa tur autoridad a wordo duna na Mi den cielo y riba tera.( Mateo 28:18).
