Den conferencia di prensa di partido AVP, drs. Mervin Wyatt-Ras a trece padilanti cu nos pais ta pasando den dificultad. E parlamentario a sigui bisa cu nos tin cuidadanonan cu no tin pan ariba nan mesa y no por facilita esaki pa nan yiunan. Tur esaki y e hecho di desempleo ta trece cun’e stress y hasta violenia den famia. Nos situacion relaciona cu COVID tin consecuencianan pa salud fysico y mental, financiero-Economico-laboral pero tambe tin consecuencianan social.
E gobierno aki na momento cu 2 mucha a perde nan bida a haci como cu tin crisis social y a priminti cu lo drecha sector social. Sin embargo esaki no a sosode manera nos hendenan y instancianan a kere. Proyectonan social no a ser entama manera cu a indica den promer instante. A pone 38 miyon disponible pero no ta mira na unda e placa aki a ser inverti. Desde hopi tempo e gobierno aki no ta dunando cuenta tampoco na Staten. Ta necesario pa nos desaroya un sociedad den cual tin libertad, igualdad y cuidadania responsabel. Un sociedad den cual tin accountability y pues gobierno ta duna cuenta na pueblo y no manera awor cu ni presupuesto di e anja aki no a ser trata. Famianan mester haya instrumentonan pa construi un mihor bida.
Netamente na e momento crucial y dificil pa nos pueblo, Evelyn Wever Croes a bula afo. Ela retira for di su responsabilidad como gobierno pa e bira demisionario y bai campanja. Pero na mesun momento e kier bin bek den gobierno atrobe.
Awor den prensa e mesun personan aki cu no a carga su responsabilidad pa 4 anja ta menciona cu e gobierno nobo mester serio y fuerte. Ta ken el a kere nos pueblo ta?
Pueblo kier un cambio for di e falta di capacidad di e gobierno aki. Pueblo ta fada cu friends and family ta ser previlegia. Pueblo ta fada di ganjamento di Evelyn Wever Croes hunto cu POR y RED paso nan a priminti cu: edad di pensioen lo a baha, mientras el a subi. A priminiti cu e ley di 6 minuut di abuso di mucha lo a ser pasa , mientras no a presente. A priminti cu ensenjansa lo mehora, mientras esaki a deteriora. Tambe a priminti cu mayornan lo ser sosteni pa medio di centronan di cuido y Trai Merdia, mientras Trai Merdia a bai atras y e ley di centronan di cuido no a keda implementa. Ademas lo a drecha skolnan, mientras esaki no a sosode. Nos hendenan tampoco no tin mucho placa den nan cartera y nan poder di compra a desminui prome cu COVID a surgi. A priminti tambe cu lo mehora calidad di bida di nos cuidadanonan, mientras cu tur dia ta corta awa y coriente di nos hendenan cu no tin trabou of entrada of ta kita nan auto of cas.
Anto e mesun Evelyn Wever Croes, despues di a benta su propio gobierno abou, paso presion a bira mucho grandi p’e, ta bisa cu segun Partido MEP gobierno nobo mester ta uno serio y fuerte. Con serio Evelyn por ta? Y con e por ta fuerte, despues cu el a core bai laga nos pueblo ora tur hende ta den dificultad. Cu ki cara e ta drenta casnan di nos pueblo?
Evelyn tabata balente si pa firma landspaketten y hinca nos pueblo cu dos ley di Reino, COHO y cu Raft, cualnan lo ser trata den Tweede Kamer y no den nos Parlamento.
El a firma pa nos perde nos autonomia y pa medidanan por ser implementa riba nos cabez. Hunto cu Dangui Oduber el a skohe pa introduci medidanan den cuido di 5 miyon.
E y Dangui a ganja cu ta Hulanda a fiha cu ta tuma medida den cuido, mientras a resulta dor di cartanan y declaracion di Hulanda cu ta nan mes a bin cu e medidanan. Tambe el a firma pa bin medida dor di cambio di nos sistema financiero y di impuesto introduciendo BTW cu lo hisa
gastonan. El a firma pa medida cu lo bin pa loke ta empleadonan publico cu lo perde nan trabou. Aki a trece ambtenaarnan hulandes pa haci e trabou aki. El a firma tambe pa bin cu medidanan laboral pa asina kita trahadonan mas facil for di trabou.
Pues tur e medidanan aki tin firma di un solo persona, Evelyn Wever Croes, hunto cu MEP, partido POR y Partido RED.
En cambio AVP ta un partido solido di hopi anja y experencia. Un partido cu a goberna Aruba y a trece desaroyo berdadero cu Hospital renoba, Imsan como Centro Oncologico, Ensenjansa cu atencion pa studiantenan y pa maestronan, skolnan cu a ser drecha, construccion di Lineair park, proyectonan di infrastructura manera Green corridor y Watty Vos boulevard, Traimerdia y centronan di cuido di mucha pa sostene mayornan, Formacion Social y mas placa den cartera di nos cuidadanonan.
E gobierno fuerte cu mester surgi despues di 25 di juni ta di AVP pa por anda cu Hulanda y renegosha loke Evelyn a hinca nos aden. Pueblo ta rekeri politiconan cu vision y determinacion cu bon plan di rescate y personanan experencia pa saca nos pais for di loke e gobierno cruel aki a hinca nos aden. Cu AVP na timon nos por Rescata, Renoba y Reconstrui NOS ARUBA, segun parlamentario Wyatt-Ras a declara.