Durante conferencia di prensa semanal di partido AVP, parlamentario drs. Mervin Wyatt-Ras a trese dilanti cu nombracion di coordinadonan di minister Dangui Oduber na DVG na e momento aki, justamente cu nos ta memey di un pandemia, ta un ehempel di nepotismo.
Nos pais desde maart te cu awor conoce un total di 4942 caso di COVID 19 y un total di 139 caso activo. E cantidad di casonan ta subiendo ainda. Nos a haya e prome wave y awor e segundo wave. Ainda e cantidad di casonan ta subiendo y si nan no baha e crisisteam di Salubridad Publico a avisa cu nan lo tuma medida pa domina e cantidad caso. Esaki ta un situacion cu nos mester pone atencion na dje. E malesa COVID 19 a afecta nos inmensamente. Un cantidad di 37.000 persona a perde trabou. Tin di e personanan sin empleo ta ricibi un suma di FASE. Tin ta bin na remarca pa subsidio di salario y otro ta haya pakete di cuminda di Fundacion pa nos Comunidad of Cruz Corra. Tin persona no ta haya ni FASE, ni subsidio di salario ni pakete di cuminda. Gobierno a tuma medida riba diferente tereno. Nos como Parlamentario a entrega 25% di nos salario. Gobierno na prome instante a entrega 20%. Despues nan tambe a entrega 25%. Minister di Salud a indica cu riba instruccion di Hulanda a corta den AZV. Esaki a conduci cu a corta den entrada di e diferente profesionalnan riba tereno di Salud. Ademas nos hendenan sin recurso financiero cu tabata haya nan djentenan falso paga no por haya esaki mas, ni ranka, ni yena djente. Esaki ta afecta especialmente nos grandinan. E “eigen bijdrage” cu personanan cu ta acompanja nan patient den exterior a ser elimina. Segun Wyatt-Ras no ta bai pa nan placer nan ra acompanjante sino pa malesa, sinembargo a corta den e esaki. Tambe tin personanan cu ta keha cu desde un periodo nan no a haya nan suma di “eigen bijdrage” y ora nan yama nan no ta haya contesta. A corta alabes den transporte, di e compania Lite Life, di personanan cu ta haya tratamento di dialyse. A compronde cu e director a bai trata di sera un contract atrobe cu Lite Life pero a perde su trabou dor di esaki. No ta conoci si e director por a haya un “Golden Handshake”. Paso no tin transparencia encuanto esakinan. AZV ta un compania independiente pero bo ta mira cu tin metamento di gobierno den dje y n’e momento aki cu no tabatin e transporte aki mas gobierno ta indica e a pone personanan di su buro pa bai hiba personanan cu ta tuma dialyse pa nan tratamento y awor nos a tende cu e personanan aki a wordo nombra of nan contracto a wordo firma pa 5 anja y cu nan ta wordo coloca den Directie Volksgezondheid den e departamento di ouderenzorg. Mervin Wyatt-Ras ta hopi stranja dor di e hecho aki. E tin alabes pueblo indigna paso na e momento aki cu nos mama y tatanan no tin pan pa pone ariba mesa di nan famia, e momento aki e minister ta bai over na esaki. Segun e minister ta indica e “nombramento no ta ilegal ni inusual. E ta bisa cu “un minister conoce hopi hende anto a para bira cu minister no por nombra niun hende”. Segun Wyatt-Ras na e momento aki bo no ta haci esey. Banda di esaki ta trata di su coordinadonan of campanjadonan. Nan ta personanan cu ta bullyers. Nan ta bin parlamento ora e minister aki tin reunion pa grita y ofende hende. Awor con personanan asina, esta bullyers, con nan por guia pashentnan. Si e pashentnan bisa nan algo cu nan no gusta nan ta capas di bully nan, esaki segun Wyatt-Ras. Paso un bullyer si e no haya guia e no ta cambia. Pues Wyatt-Ras ta haya esaki un situacion sumamente penoso. Con e minister aki por hustifica cu den un pais cu tin bon gobernacion, cu den un pais cu ta integro algo asina ta sosode. Esaki ta un ehempel di e minister aki. Djies aki ta sigui mas nombracion di ministernan. Di un banda corta den nos hendenan of miho bisa cu nos hendenan tin cu entrega y di otro banda hancho pa gobierno. Esaki no ta e situacion cu nos mester tin na Aruba. Aworey colega a papia di landspaketten y di RAft. Cu e dos leynan di Reino aki Aruba a keda na rudia. Dor di COHO, nos ta full coho y tog ta keda nombra hende. Den landspakket ta menciona cu mester bai kita ambtenaar. Personanan pues ta bai wordo kita foi trabou dor di e gobierno. Di otro banda ta bai nombra esnan liga nan nan. Algo otro cu ta mustra riba falta di valor y norma di e minister ta cu e ta ubica su coordinadornan na e afdeling di ouderenzorg. Esaki ta mesun departamento cu a lanta a base di e ley di ouderenzorg cu a ser aproba den parlamento y cu mesun minister y su fraccion di Mep a vota contra. Cu ki cara por ubica trahadonan bou di ouderenzorg. Di un banda e minister ta contra algo y ora cu ta cumini’e e ta bai pone su hendenan bou dicho departamento. Ki moralidad y valor y norma e tin. E minister aki no ta actua manera mester ta igual cu su partido cu memey di un pandemia ta lansa un logo nobo NeP, igual cu nepotismo den e partido, cu ta coloca friends and family tur caminda den gobierno. Esaki mientras cu tin ciudadano den situacion dificil sin entrada of cu ta acompanjante di patient cu tin cu paga un eigen bijdrage, pa gobierno por duna amigo y famia beneficionan.
