Parlamentario drs. Mervin Wyatt-Ras a trece padilanti cu dia 31 di mei ta e ultimo dia cu e ley regardando e medida di eigenbijdrage of contribucion propio, di zelfzorgmiddelen y lista positivo den cuido lo keda den parlamento pa despues e ser ehecuta. E ley aki ta titula: “Ontwerplandsbesluit omtrent de invoering van eigen bijdragen voor het geldigmaken van de aanspraak op een aantal verstrekkingen en tot wijziging van het Landsbesluit aanspraken genees- en verbandmiddelen (AB 2004 no. 18) in verband met de inperking van de aanspraak van verzekerden op geneesmiddelen ten laste van het Algemeen Fonds Ziektekosten”.
Segun articulo 22 inciso 2 di e Ley Ziektekostenverzekering Staten mester haya dos siman pa expresa deseonan y objecion na minister encuanto di e ley menciona.
Fraccion di AVP a haci uso di su derecho pa pidi un reunion publico al respecto dia 19 di mei cu presencia di e minister encarga. Sinembargo e presidente di Parlamento no a yama e reunion aki, te cu e dos siman a pasa awe. Ayera 30 di mei a bolbe manda un rappel pa e reunion publico tuma lugar, pero sin resultado. Wyatt-Ras mes a papia cu presidente di Parlamento pa wak si e por yama e reunion. El a bisa ta druk. Fraccion di AVP ta lamenta esaki, pasobra siman pasa na momento cu minister presidente a manda un carta riba diabierna 20 di mei pa pidi un reunion cu Parlamento ya dialuna presidente di Parlamento a core yama e reunion. E ora si tabata por yama un reunion publico. Den e caso aki no ta na gobierno pero na presidente di Parlamento pa yama e reunion. Aki por nota con e presidente ta faya di no yama e reunion prome cu e fecha di 2 siman. Despues di dia 31 di mei e Landsbesluit lo wordo ehecuta sin cu parlamento a ser skucha y manera cu Mike a splica nos ciudadanonan ta bai haya nan confronta cu eigenbijdrages na momento cu nan bai serca Specialista, Spoedeisende Hulp, Huisartsenpost, Botica y Laboratorium. Esaki ta inhusto paso si un persona bai specialista y bai na e diferente stakeholders menciona e por paga total entre 20-50 florin pa un solo biaha. Si tin mas medicina cu ta riba e lista positivo austerisa e lo por paga hasta entre 100-200 florin. Con un persona cu no tin entrada of ta biba di salario minimo lo por paga esaki? Wyatt-Ras ta trece padilanti cu Parlamento a reuni cu diferente stakeholders den cuido dia 11 di februari di e anja aki, durante cual nan a trece nan preocupacionan padilanti. Den e carta a manda 25 pregunta pa gobierno. E pregunta nan aki nunca no a ser contesta y pesey tambe fraccion di AVP a dicidi di yama un reunion publico pa haya oido pa preocupacion di cuidadanonan. E diferente stakeholders a trece padilanti cu na momento cu pueblo mester paga, no solamente ora bai serca un dunador di cuido pero tambe ora cu tin cu paga pa medicinanan, esaki lo tin un impacto hopi grandi ariba nos ciudadanonan. E ta bai trece cun’e klassezorg, kiermeen esnan cu tin placa lo por bai dokter. E ta bai trece cun’e vermijdingsgedrag di nos hendenan na caminda cu na momento cu un persona sinti’e malo e no lo bai specialista paso e no tin placa pa paga, locual lo empeora su salud. Tambe pago di eigenbijdrage serca diferente stakeholder lo trece cu n’e mas trabou administrativo, gastonan y posibilidad di fraude si no tin suficiente control.
Wyatt-Ras ta menciona alabes cu e medidanan den cuido no ta cuadra cu Sustainable Developmental Goals (SDG’s) cu gobierno ta menciona den tur nan presupuesto nan. Especialment SDG 3 cu ta trata cuido di calidad. E ta menciona cu despues di e conferencia di prensa lo e bai un reunion tocante SDG’s den Parlamento.
Wyatt-Ras ta menciona alabes un presentacion di AZV den cual a ser treci padilanti cu e entradanan di e seguro medico aki ta recuperando. Tanto di primanan como di BAZV. Tabatin un deficit den AZV den e temporada di COVID caminda cu e cuidadanonan cu no tabatin trabou no tabata paga e primanan. Tampoco no tabata haya suficiente na entrada di BAZV. Mientrastanto e situacion a mehora. Trahadornan ta pagando prima. Falta si mas control di loke pueblo ta paga na BAZV pa e yega na AZV.
Segun Wyatt-Ras tin ehercicionan cu AZV por bai haci pa baha gasto. P.e. controla unda e suma di BAZV ta bai, mihor cooperacion entre dokternan y specialistanan den promer linja y entre prome linja y di dos linja. Tambe compra di medicinanan por ser organisa mas conhuntamente of central, cu lo baha gasto. Banda di esey turismo medico por ser stimula pa obtene ingreso. Tratamento oncologico lo por tuma lugar aki mes y atrae pashentnan den region pa bin tuma nan tratamento aki na Aruba. Tambe tin cu evalua loke e hospitalnan den exterior, na cual ta manda nos pashentnan, tin cu haci pa baha gasto. Tin pashentnan cu ta keda mucho tempo na otro pais wardando tratamento. Aki lo por tin mihor cooperacion pa evita esaki y baha gasto. Tur e ehercicionan menciona por ser haci pa evita cu tin cu tuma medida riba nos pueblo. Gobierno como esun cu ta na cabez mester por wak interes general y no solamente su propio interes of di grupito. Wyatt-Ras y su fraccion ta hopi desapunta con ta atende cu e situacion aki. Como parlamentario na momento cu un ley drenta Parlamento e y su fraccion tin e derecho como representante di pueblo di haci haci peticion pa un reunion pa asina pueblo sa tur locual ta pasando y pa tuma un mihor decision. Sinembargo dicho reunion no ta ser yama. Esaki ta inacceptabel.
Ta bai tuma e medidanan den cuido pasobra Evelyn Wever Croes a firma e landspakketten y a compromete pais Aruba na medidanan riba diferente tereno. Entre otro introduci BTW y lo introduci e ley di “hire and fire” cu lo haci posibel pa kita trahadornan facil for di trabou.
Wyatt-Ras finalmente ta bolbe haci un apelacion na Parlamento di Aruba pa asina yama e reunion publico. E ta menciona cu den pasado a yega di pasa caba diferente di e Landsbesluiten, unda cu fraccion di AVP a haci pregunta sin haya contesta of a haya contesta te despues cu e LB a bin na vigor caba. E situacion aki no por den un pais democratico den cual nos mester ofrese nos ciudadanonan e seguridad di representa nan opinion. Wyatt-Ras ta urgi un biaha mas na e presidente di parlamento pa yama e reunion pa asina nos por duna nos punto di bista. Pakico? Pasobra e persona cu no tin placa mas den su cartera ta esnan cu lo bira mas e victima di e situacion aki. Nos como representante di pueblo en todo caso fraccion di AVP ta considera nos deber di sali na vanguardia di nos pueblo especial esnan mas vulnerable den nos comunidad.
