Parlamentario drs. Mervin Wyatt-Ras, durante conferencia di prensa di fraccion di AVP, a trece padilanti cu den e tercer ola di COVID-19 e cantidad di casonan a aumenta drastico e siman aki y cu esaki ta hopi preocupante pa nos pais. Diamars a constata un cantidad di 102 caso nobo ariba un solo dia, total 510 caso y cu 82 fayecido. E cantidad di casonan den hospital a escala. Tin un total di 41 pashent interna den hospital cu COVID, di cual tin 13 den ICU y 28 riba afdeling special pa e virus. Hospital a bati alarma na mesun momento y diferente di e specialistanan y e presidente di Raad van Bestuur a bin padilanti pa trece nan preocupacion na conocimento di nos pueblo. Nan ta enfrentando un situacion dificil dor cu banda di e casonan tin diferente di e profesionalnan den cuido cu ta bira malo dor di e virus. Esaki tin di haber tambe cu e diferente variantenan di e virus cu tin na Aruba. Tin na Aruba 141 variante di e tipo Britanico, 3 di e tipo Brazilero, 2 di e tipo Sur Africano y 8 di e tipo Californiano. Dor di e variantenan e contagio ta mas rapido y ta afectando hopi mas hende cu consecuencianan mas grave. Tin hasta un mucha interna den hospital actualmente, locual ta hopi preocupante y ta haci cu mester averigua unda e brote of clusternan ta.
E parlamentario a trece padilanti cu durante e celebracion di dia di Himno y Bandera tabatin hopi hende ariba caya y nos comunidad ta un comunidad calido. Nos hendenan gusta brasa y sunchi otro. Hopi hende a bishita otro tambe den e dianan ey. Kizas asina a bin mas contagio, pero tambe e variantenan ta plama di un persona pa otro mas lihe. Un aspecto cu ta hunga un rol tambe ta e vacunanan. Manera por a tuma nota mas o menos 30.000 persona a tuma e vacuna, mientras ta rekeri pa mas o menos 85.000 persona tuma esakinan pa por crea e imunidad di nos poblacion. Rond di e vacunanan tin bastante discucion. Tin cuidadano ta pensa cu nan ta mara na politica. Ta weita cu e minister encarga cu Salubridad ta bisti na geel y ta saca potret cu su mokete pa promove pa tuma vacuna. Otro ministernan, hasta e minister President, a bai bisti na t-shirt, manera campaña nan ta bai y ta haci of duna impresion cu e vacuna ta di un cierto partido of partidonan politico. Esey ta trece cune cu personanan ta kere cu tuma e vacuna ta algo politico. E idea aki ta ser reinforsa dor cu e minister di Salubridad ta na e sitionan di vacuna pa saca foto cu esnan cu tuma vacuna, locual ta stroba privacidad di e pashentnan. Segun Wyatt-Ras e asunto di vacuna mester ta den man di profesionalnan y no den man di politiconan. Ademas e forma cu ciudadanonan por a inskribi pa vacuna den comienso no tabata cuadra cu nos situacion. Wyatt-Ras tabatin critica riba esaki. Tin un cantidad di persona cu no por move pa bai registra na MFA ni tin un iphone, corda pa nan por registra via di un app. E parlamentario ta contento si cu na momento cu e ta lansa su preguntanan na minister, aunke e no ta haya contesta, e issuenan ta ser considera dor di e profesionalnan pa cu e maneho. Aki por menciona e peticion di Wyatt-Ras pa envolvi e docternan di cas pa duna sosten ora ta trata vacuna na esnan cu malesanan chronico.
Wyatt-Ras ta lamenta cu e reunion di caracter informativo cu tabata planea diamars dia 23 di maart den Parlamento, den cual e minister mester a bin duna informacion encuanto e situacion actual, a ser posponi. Parse cu e minister a zeg af y despues por a tende cu e minister presidente a bai den un cuarentena preventivo. Netamente na e momentonan cu mester a duna cara, ambos minister a disparse.
Parlamento ta e organo, den cual parlamentarionan por debati cu minister y unda por haya informacion y trece e keho y dolornan di nos pueblo na oido di gobierno. Eigenlijk lo mester a yama un reunion publico pa trata e asunto di COVID pero ta asina cu den Parlamento no ta honra peticionnan di fraccion di AVP pa reunionnan publico. Banda di esey na momento cu tin un reunion di caracter of indole informativo e presidente ta laga ministernan usa politica of tira palabra politico den direccion di parlamentarionan, mientras ora dicho parlamentarionan reacciona e no ta laga nan trece nan punto padilanti. Segun Wyatt-Ras tin fayo den democracia den Parlamento, dor di cual nos no por haci nos trabou manera cu mester ta. Enbista cu e reunion cu e minister no por a sigui Wyatt-Ras ta mandando diferente pregunta den direccion di e minister.
Ta lastima cu no ta haya contesta ariba preguntanan cu ser haci. Mientrastanto e situacion ta alarmante. Wyatt-Ras a tuma nota di e apelacion di Rijksinstituut voor Volksgezondheid en Milieu (RIVM), hunto cu e minister Hulandes, de Jonge, pa busca enfermeronan via di uitzendburo internacional pa bin traha na nos paisnan den Reino. Segun e parlamentario enbes cu ta busca enfermeronan y otro profesional di exterior mester wak aki mes. Tin hopi profesional cu no por haya trabou den hospital. Ban recruta for di e personanan aki promer cu buska hende di afo. Wyatt-Ras ta extende palabra di sosten na tur esnan cu ta traha riba e tereno aki pa continua e lucha nos no a vence COVID-19 ainda. Nos mester traha hunto y saca politica for di esaki pa asina logra vence e virus aki di berdad.